उहइ समइ फरात नदी क पच्छिम क पहँटा क राज्जपाल तत्तनै रहा। तत्तनै, सतर्बोजनै अउ ओनके संग क लोग जरुब्बाबेल अउर येसूर अउ निर्माण करइवालन क लगे गएन। तत्तनै अउ ओकरे संग क लोग जरुब्बाबेल अउ ओकरे साथ क लोगन स पूछेस, “तू पचन्क इ मन्दिर क फुन स बनावइ अउ एका दिवारन क बनावइ क काम पूरा करइ क आदेस कउन दिहस?”
मुला परमेस्सर यहूदा क प्रमुखन पइ दृस्टि रखत रहा। निर्माण करइ वालन क तब तलक काम नाहीं रोकब पड़ा जब तलक ओनकर विवरण राजा क जरिये न पठइ दीन्ह गवा। उ पचे तब तलक काम करत रहेन जब तलक राजा दारा आपन जवाब वापस नाहीं पठएस।
राजा दारा, आप क मालूम होइ चाही कि हम लोग यहूदा प्रदेस मँ गएन। हम लोग महान परमेस्सर क मन्दिर क गए। यहूदा क लोग उ मन्दिर क बड़के पाथरन स बनावत अहइँ। उ पचे देवारन मँ काठे क बड़की बड़की सहतीरन डावत अहइ। काम बड़ी होसियारी स कीन्ह जात अहइ, अउर यहूदा क लोग बहोत मेहनत करत अहइँ।
हम लोग ओनके प्रमुखन स कछू सवाल ओनके निर्माण कार्य क बारे मँ पूछेन हम लोग ओनसे पूछेन, “तू पचन्क इ मन्दिर क फुन स बनावइ अउर एकरी छते क काम पूरा करइ क मंजूरी कउन दिहस ह?”
उ पचे हमक इ जवाब दिहन: “हम लोग सरग अउ धरती क परमेस्सर क सेवक अही। हम लोग उहइ मन्दिर क बनावत अही जेका बहोत बरिस पहिले इस्राएल क एक महान राजा बनाएस अउर पूरा किहे रहा।
एह बरे सेसबस्सर आवा अउर उ यरूसलेम मँ परमेस्सर क मन्दिर क नेंव क काम पूरा किहस। उ दिना स आजु तलक मन्दिर क निर्माण क कार्य चलत आवत अहइ। मुला इ अबहिं तलक पूरा नाहीं भवा ह।
अब जदि राजा चाहत हीं तउ कृपा कइके उ पचे राजा लोगन क लेखन क हेरइँ। इ लखइ बरे हेरइँ कि का कुस्रू राजा क जरिये यरूसलेम मँ परमेस्सर क मन्दिर क फुन स बनावइ क दीन्ह गवा आदेस फुरइ अहइ अउर तब, महामहिमा, कृपा कइके आप हम लोगन क पत्र पठवइँ जेहसे हम जान सकी कि आप इ विसय मँ का करइ क निर्णय लिहन ह।