Cha daihti liata, hrohsopa Hâkai nata Idô sawchapawpa Zekaria ta Zudâh nata Zerusale liata Zu chyhsa a ypazy hnohta ama chô liata a ypa Izarei Khazohpa moh ta hrohsona bie phuah ei ta.
Siati sawchapawpa Zerubâbe nata Zôzadâ sawchapawpa Zesua cha thyu ei ta, Zerusale liata Khazohpa o paduapathina rai cha hria pathao heih ei ta. Khazohpa hrohsopazy chhao, âmo bao awpa ta ama hnohta y ei ta.
Cha nona chata Chavah Haosâ râhvaotuhpa Tâtenai nata Sethâbôzenai nata ama hrialâhpazy âmo lâ a vy ei ta, ama hnohta, “He o tôhtlâh padua ta, a o paloh awpa ta ahy ma bie châ pie ei?” tah ei ta.
Châhrasala Khazohpa mo cha Zu machâzy chô liata a choh ta, Dâria lâta tlôkheipa achhyna châ ama hmô hlâlei paduapathina raihria a chalih a chhuah veih ei.
He he Chavah Haosâ râh avaotuhpa Tâtenai nata Sethâbôzenai nata a hrialâhpa Chavah Haosâ lâta a ypa râhvaotuhpazy ta Bei Dâria hnohta châ ama paphaopa a châ.
He he abei ta vaw pahno mawh sy. Zudâh râh liata Khazohpa rônahpa o lâ khy pi ta. O cha alô lai ngaitapazy ta sapa châ ta, a pâhchhôzy tho ta chhôhpa a châ. Ama ku liata rai cha a phapa ta sie ta, a hmasie lymâ.
Hetana heta miah amâ chhy: ‘Avâ nata alei Khazohpa chakaotuhpazy châ pi ta, kô hluhpi a sie hapa liata paduapa, Izarei bei rônahpa ta sa ta, a vaw paloh hapa o eima sa pathi.
Miah pathlatuhpazy ta avâ Khazohpa hie ama vaw pahâh hapa vâta, âmo cha Kaldia chyhsa Babylaw bei Nebukaneza ku liata pie ta, ano chata o he parao ta, Izarei chyhsazy cha Babylaw lâ sei ta â chhi ha ei.
Nebukaneza ta Zerusale liata Achhyna o liata ngôh nata tâkâ hmobaohzy la ta, Babylaw râh achhyna o liata a sopazy cha, Bei Kôresâ ta Babylaw achhyna o tawhta la ta, râhvaotuhpa ta a sopa Sebâza hnohta hlâ ta,
a hnohta, “He hmobaohzy he phaoh la, sie la, Zerusale liata Achhyna o liata soh la, Achhyna o cha a y tyhna su liata paduapathipa châ mawh sy,” tah ta.
Chatanachata Sebâza cha vaw tlô ta, Zerusale liata Achhyna o lôbô cha bô ta, cha daihti tawhta tahmâ taihta, o cha sa lymâpa châ ta, châhrasala patlôpa châ mâh vei,’ tah ei ta.
Chavâta abei ta pha a tah khiahta cha, Babylaw liata abei hmo parohpazy sopakhyna liata tluapa châ sala, Zerusale liata Khazohpa o he paduapathi awpa ta, Bei Kôresâ khata biepiepa a vaw tao tlai ma tahpa mo pasiapa châ sala, he kyh liata abei ta a khozie miah pahnosa mawh sy,” tah ei ta.