Kane Zerubabel gi Shealtiel kod Jeshua wuod Jozadak owinjo wechegigo, ne gichako gero Od Nyasaye Jerusalem, kendo jonabi mag Nyasayego ne ni kodgi, ka konyogi.
Tatenai ma ruodh piny man loka Yufrate, gi Shethar-bozenai kod jowetegi nobiro irgi piyopiyo, mowachonigi niya, “En ng’a mane omiyou thuolo mar gero odni, kendo tieko loso gik manie iye?”
Eka jogo nooro wach ni ruoth Darius, kanyise gima timore. To Nyasaye ne ni kod jodong jo-Yahudi, omiyo ne ok ochung-gi mondo giwe tich ka pod irito dwoko moa kuom ruoth.
Ruoth mondo ing’e ni ne wadhi e piny Juda, mi wayudo ka jodong jo-Yahudi gero Od Nyasaye maduong’ gi kite madongo kod yien moketi e kor ot. Tich tiyore adimba, kendo odhi nyime maber e lwetgi.
To ne gidwokowa niya, ‘Wan jotich Nyasach polo gi piny, kendo wagero ot mane oyudo oseger chon, higni mang’eny mokadho. Ruodh Israel maduong’ ema nogere, motieke.
To kata kamano, kwerewa mowang’o i Nyasach polo, mi Nyasaye nochiwogi e lwet Nebukadnezar ja-Kaldea, ruodh Babulon mane omuko odno, kendo otero jowa Babulon e tuech.
To bende ne nitie gik lemo moko molos gi dhahabu kod fedha e Od Nyasaye mane ni Jerusalem. Nebukadnezar nogolo gigo, motero Babulon, kendo oketogi e Hekalu man kuno. Ruoth Kuros nogolo gigo e Hekaluno, moketogi e lwet ng’at moro ma nyinge Sheshbazar, mane oseketo ruodh pinyni, kowachone niya,
Emomiyo, koro ruoth, kineno ni ber, to yie mondo onon ane ka en adier ni ruoth Kuros nogolo chik mondo oger Hekalu mar Nyasaye Jerusalem. Ruoth bang’e yie iornwa paroni kuom wachni.”