O Ajeo ta o Zakarias, chavo katar o Ido sea poraukura, ta phende e judionenge katar o Juda ta katar o Jerusalem e orba kai dia len o Gazda, o Del katar o Israel.
Ondaka o Zorobabel, chavo katar o Salatiel, ta o Jesua, chavo katar o Josadak, thodepe te radin pale te vazden o cher e Devleko ando Jerusalem, ta e poraukura e Devleke sea lenchar ta pomozina len.
Ande gola llivesa avilo lende o Tatnai kai gazdarila pe ogoia rig katar e len Eufrates, ta o Setar Boznai ta e llene kai avena lenchar te phenen lenge gia: ¿Ko phenda tumenge te cheren gava cher ta te vazden leke zidura?
A o Del arakhela e judionen kai gazdarina, ta nasti achade lengo rado lligo ni bichalde iek lil kai o Dario. Ta bichalda vou lende aver lil te phenel lenge so ka cheren.
Ta o Tatnai kai gazdarila pe ogoia rig katar Eufrates, ta o Setar Bosnai ta e gazda kai pomozina le kai sea pe ogoia rig katar e len, bichalde kai o charo Dario iek lil.
Manga te llane kai ande phuv katar o Juda, o cher katar o baro Del, vazden le bare barrenchar. Ta akana thoven pe zidura kotora kastune, ta radin but zurale.
Von phende amenge kai blagosin e Devle katar o miloso ta e phuv, ta kai vazden pale o cher kai but burs palpale vazdiaia le iek baro charo katar o Israel.
Ta i phende kai lenge purane joliarde e Devle katar o miloso, ta kai vou dia len kai o charo Nabukodonosor katar e Babilonia, kai saia kaldeo, ta vou saia kai perada gua cher e Devleko ta inllarda len phangle ande Babilonia.
Ta i phende amenge kai o charo Siro ikanda katar o cher lenge delengo e ezgode sunakune ta rupune kai o Nabukodonosor liaia katar o cher e Devleko ando Jerusalem ta inllardaia len ando cher katar lenge dela ande Babilonia, ta kai diaia len kai iek lleno kai ikhardola Sesbasar, kai thodaia le gazda katar o foro.
O Siro phenda e Sesbasareke te chidel e ezgode ta te iril len kai o cher e Devleko ando Jerusalem, ta te vazdel pale isto pe gua than o cher e Devleko.
Te mangea tu charo, ka roda ande lila e charoinake ande Babilonia, te dikha dal si chache kai o charo Siro phenda te vazden pale o cher e Devleko ando Jerusalem, ta manga tutar te phene amenge so ka chere katar gaia orba.