تڏهن زربابل ولد سالتيايل ۽ يشوع ولد يوصدق يروشلم ۾ خداوند جي گھر کي وري تعمير ڪرڻ جي ڪم کي لڳي ويا. انهن ٻنهي سان خدا جا نبي بہ گڏ هئا جن ساڻن مدد پئي ڪئي.
انهيءَ دوران اولهہ واري فرات نديءَ جي صوبي جو گورنر تتني ۽ شتر بوزني ۽ انهن جا ساٿي وٽن آيا ۽ کانئن پڇيائون تہ ”هن عبادتگاهہ ۽ انهيءَ جي ڀتين کي وري تعمير ڪرڻ جو اختيار اوهان کي ڪنهن ڏنو آهي؟“
پر يهودي اڳواڻن تي پنهنجي خدا جي نظر هئي، سو انهن عملدارن يهودين کي تيستائين نہ روڪيو، جيستائين اهو معاملو دارا شهنشاهہ تائين پهتو ۽ انهيءَ کان لکت ۾ موٽ نہ ملين.
پر پوءِ جڏهن اسان جي ابن ڏاڏن خدا کي ڪاوڙايو، تڏهن هن کين بابل جي بادشاهہ نبوڪدنضر ڪسديءَ جي حوالي ڪري ڇڏيو، جنهن خدا جي هن گھر کي ناس ڪري ڇڏيو ۽ ماڻهن کي بابل ڏانهن جلاوطن ڪري وٺي ويو.