Îgiita rîu, kîroria Hagai na kîroria Zekaria mûtaana wa Ido, nî baarorerie Ayahudi barîa baarî Juda na Jerusalemu riîtweene rîa Mûrungu wa Israeli ûrîa waabatongeeretie.
O îgiiteene rîu rîongwa Tatenai mûrûngamîîri wa nthîgûrû ya bwa rûgûrû rwa rûûjî rwa Eufurate, na Shethari-bozenai, na antû ba mûûrû jwaao nî beejîre barabooria atîrî, “Nûû ûbweete rûûtha rwa gwaka nyomba îîjî na bûmîgemia.”
Îîjî nîyo barûga îrîa yaandîkîri mûnene Dario, nî Tatenai mûrûngamîîri wa nthîgûrû ya bwa rûgûrû rwa Rûûjî rwa Eufurate na Shethari-bozenai na antû ba mûûrû jwaao, na atongeeria ba gûntû kûu.
Ga tûkwenda gûkûmenyithia gwe mûnene atî nî tweetîre nthîgûrû ya Juda na twethîra nyomba ya Mûrungu ûrîa mûnene mma îgîakagwa. Nî twethîîre îgîakagwa na maiga jamanene na mbaaû igîîkagîrwa nthingoone. Nayo ngûgî îîu nî îtîîte na mbere mono, na aaki barî na wîru mono.
Îndî tontû biûjûjû bieetû nî biathûûrîrie Mûrungu wa Îgûrû, we nî aabinenkanîîre njareene cia Nebukadineza mûnene wa Babiloni, ûrîa Mûkalidea, ûrîa waakoborangîre nyomba îîu buru na arathaamia antû arabaikia Babiloni.