Nacio nthingo cia nyomba îîu ciakagwe o kosi ithatû cia maiga jamanene ikîgiitanagua na kosi îmwe ya mbaaû. Ngûgî îîu yonthe ya waaki bûu îrîwe kuuma mûthithûûne jwa mûnene.
Bûkaarigîîrieni ngûgî îîu ya nyomba ya Mûrungu îîta na mbere. Rekeeni mûrûngamîîri wa Ayahudi na atongeeria bangî ba Ayahudi baake nyomba ya Mûrungu antû arîa yaaki mbereene.
O kîrîa kîonthe gîkeendekana, kîrwethîrwa nî tûreegwa, kana ntûrûme, kana ng'ondu nîûntû bwa igongwana bia gwakîîria bikîritîrwa Mûrungu wa Îgûrû, kana birwethîrwa nî nkano, kana chumbî, kana ndibei, kana maguta, kana kîrîa kîonthe athînjîri-Mûrungu barîa barî Jerusalemu bakeenda, nî banenkagîrwe kio kûringana na ûbatu bwaao bwa o ntukû o ntukû gitîgûcerithîîrua.
Nabo akûrû ba Ayahudi nî beetithîrie ngûgî ya waaki na mbere mono, bagîîkagîrwa inya nî ûroria bwa kîroria Hagai na Zekaria mûtaana wa Ido. Nî baarîkîrie waakî bwa kîûrû kûringana na wendi bwa Mûrungu wa Israeli, na kûringana na waatho bwa anene ba Parasia tabo Koreshi, na Dario, na Aritashashita.
Nabo antû ba Israeli, na athînjîri-Mûrungu, na Alawi, na antû bangî barîa baacokere kuuma kîthamîrioone nî baakûngwîre mambura ja kwathûrîra Mûrungu nyomba îîu.
Barathithia mambura ja mîgaate îtimbithîtue ntukû mûgwanja bagwîrîtue nîûntû MWATHANI nî abaeete kûgwîrua na nî aagarûrîte nkoro ya mûnene wa Asîria kenda abateethia ngûgîîne ya waaki bwa nyomba ya Mûrungu, tawe Mûrungu wa Israeli.