Tuî antû ba Israeli, amwe na eekûrû beetû, na aana beetû barîa barî na kîrîra nî tûciathûranîte na ageni barîa bakaraga nthîgûrûûne yeetû. Ningî kinya athînjîri-Mûrungu, Alawi, na aini na antû barîa baritaga ngûgî kîûrûûne kîa Mûrungu, nî baciathûranîte na ageni bau ba kuuma nthîgûrû ingî.
Tûtîgûraga into kana irio ntukû ya sabatû kana ntukû ingî cia thigûûnkû kuuma kîrî antû ba mîgongo îngî barîa batwîre nthîgûrûûne yeetû. Tûtîrîmaga miuunda yeetû mwaka jwa mûgwanja jwaakinya na tûkarekagîra barîa bakethagîrwa barî na marandû.
Fetha îîu îgatumagîrwa nîûntû bwa into birîa bikethagîrwa bikîendekanaga kîûrûûne. Nabio nî mîgaate yaathûrîri Mûrungu, na igongwana bia irio na bia gwakîîria birîa biaaritagwa ntukû cionthe, na bia sabatû, na bia mweri jûkîguûka, na bia biatho bitue na bia into bibitheru, na bia kûthiria meeyia ja Israeli na igongwana nîûntû bwa ngûgî irîa iritagwa kîûrûûne.
Baatuî amwe na athînjîri-Mûrungu, na Alawi tûkaaringaga kuura o mwaka o mwaka nîkenda tûmenya nî mîciî îrîkû îkaareetaga nkû kîûrûûne kîa Mûrungu weetû. Nacio nîcio îgaakagîîria kîgongwana kûringana na Waatho nîûntû bwa MWATHANI Mûrungu weetû.
Tûkaathûragîra Mûrungu ataana beetû ba rikithaathi na rikithaathi cia ndîîthia cieetû. Bo amwe na ndîîthia iu tûkabaikagia kîrî athînjîri-Mûrungu o ta ûrîa kwaandîki Wathoone.
Tuî antû ba Israeli na Alawi tûkareetaga into bia maketha jeetû, na ndibei, na maguta ja nzeituni tûnyomba tûrîa twîkagwa into bia kîûrû birîa bitumagîrwa antû bakîrîa. Tûnyomba tûu nîtu tûkaragwa nî athînjîri-Mûrungu barîa beethagîrwa barî ngûgîîne, na akaria kîûrû, na aini. Tuî tûtîtîîjîra kîûrû.