Eliashib jadolo maduong’ kod jodolo mamoko ne jochako tich, mogero Rangach miluongo ni Ranga Rombe. Ne gichungo sirni mage, mi girwako thikene. Ne gigero ohinga mochopo kama oger mabor mar ng’icho mar Hamea, kendo nyaka kama oger mabor mar ngicho mar Hananel. Eka ne giguedhe.
Meremoth wuod Uria ma wuod Hakoz nogero migape e dirgi. Ng’at mane ogedo e dir jo-Meremoth ne en Meshulam wuod Berekia ma wuod Meshezabel. Zadok wuod Baana ema nogedo e dir Meshulam,
Uziel wuod Marhaya, jatich dhahabu, notiyo e dir jogo. Hanania, ma jalos gik mang’ue ng’ar, nogedo mokiewo gi Uziel ka gigero ohinga mar Jerusalem nyaka kama ohinga lachgo.
Hanun gi jo-Zanoa nogero Ranga Holo, mi girwako thikene gi radedi kod lodi mage, to bende ne gigero ohinga ma borne oromo mita mia abich nyaka gichopo e Ranga Owuoyo.
Shalum Kol-hoze, jatend jo-Mizpa, nogero Ranga Soko, moketone tado, kendo orwako thikene gi radedi kod lodi mage. Bende nogero ohinga, chakre Yap Siloam, kama omanyore gi orundu mar ruoth, nyaka raidhi malor koa e Dala Daudi.
Ezer wuod Jeshua jatend Mizpa nochako gero migawo machielo e dir jo-Binui, kama omanyore gi yo ma idho kochomo kar keno mar gilweny man kama ohinga ogomogo.
Pedaya wuod Parosh nochako gedo e dir Palal nyaka kama omanyore gi Ranga Pi, gi yo ka wuok chieng’ kendo momanyore gi kama oger mabor mar ng’icho mowuok oko.
Zadok wuod Imer nogedo e dir jodolo kama omanyore gi ode. E dir Zadok to Shemaya wuod Shekania mane jarit Rangach mochiko yo wuok chieng’, ema nogedoe.
Hanania wuod Shemelia, kod Hanun wuod Zalaf mar auchiel ne jochako gero migawo moro e dir Shemaya. Meshulam wuod Berekia noloso ohinga e dir jogo, kama omanyore gi ode.
Malkia jatich dhahabu notiyo e dir Meshulam, mogedo nyaka od jotich Hekalu, kod od johala, kama omanyore gi Rangach Miyworoe, kendo nyaka ot man ewi tado mar kama ohinga ogomogo.