Tuma min na Sanbala ni Tobiya, ani arabuw, ni amoniw ani Asidɔdikaw y'a mɛn ko kogo nin lalagabaara be tagara ɲa ani ko yɔrɔ minw tun benna, k'olu daminɛna ka tugu, u dimina kosɔbɛ.
Ne y'o filɛ ka ban dɔrɔn, ne y'a fɔ ɲamɔgɔw ni kititigɛlaw, ani jama tɔɔ ye ko: «Aw kana siran u ɲa! Aw k'aw hakili jigi Matigi ka koo la. A ka bon, mɔgɔ ka kan ka siran ale lo ɲa, aw ka kɛlɛ kɛ aw badenw n'aw dencɛw n'aw denmusow, n'aw ka musow n'aw ka somɔgɔ tɔw kosɔn.»
Tuma min na an juguw y'a mɛn ko an tun lasɔminin lo, ani ko Ala y'a kɛ u ka kolatigɛnin cɛnna ten, an kɔsegira ka kogo lɔko daminɛ tugu, an kelen kelen bɛɛ n'an ta.
K'a ta o loon ma, ne ka baarakɛlaw tilan kelen tun be kogo lɔra, tilan kelen lɔnin be n'u ka tamanw ni nigɛkunbɛnnanw, ni toonw, n'u ka fani nigɛlaman ye u kaan na. Minw kɛra kuntigiw ye, olu tun lɔnin be Zuda kɔmɔgɔw ka soow bɛɛ kɔfɛ,
Minw be kogo lɔra, olu kelen kelen bɛɛ tun be baara kɛra, n'u ka murujan sirinin b'u cɛɛ la. Mɔgɔ min tun be ni buru fiyɛta ye, ale tun lɔnin be ne gɛrɛfɛ.
O waati la, n y'a fɔ jama ye tugu ko u kelen kelen bɛɛ ka to Zeruzalɛmu sufɛ ani u ka baaradenw, ko an ka to ka kɔlɔsili kɛ sufɛ, tilefɛ an be baara kɛ.
Ne wo, n badenw wo, ne ka baaradenw wo, kɔlɔsilikɛbagaw wo, an ka fani tun b'an kaan na tuma bɛɛ, an labɛnnin tun be tuma bɛɛ la, n'an ka kɛlɛkɛminanw b'an bolo.