Mi hoo'i anniya felugo mawɓe e kaliifa'en. Mi feli ɓe, mi wi'i: “On ɗon ɗaɓɓa riba koo moy dow banndum!” Nden mi ewni mooɓtorde mawnde ngam daliila maɓɓe.
Ndokkite ɓe hannde nde'e gese maɓɓe e inabooje maɓɓe e jaytunje maɓɓe e cuuɗi maɓɓe. Njaafane ɓe riba ceede e hataka alkamaari e inaboojam kesam e nebbam, ko on tokkoto ɓe fuu.”
Nden mi fiɗɗi gawargal limce am, mi wi'i: “Bana nii Allah fiɗɗuma koo moy diga saare mum e maral mum, to o hebbitinaay hunayeere maako. O laato piɗɗaaɗo, cooko bana non!” Mooɓtorde fuu wi'i: “Aamiina”, ɓe maŋgti Jawmiraawo. Nden ummaatoore waɗi ko wi'a.
Ngomna'en aartuɓe yam teddani yimɓe, ɓe koo'i nyaamdu e njaram non boo ceede cardi cappanɗe nayi. Huuwooɓe maɓɓe boo kolli yimɓe baawɗe. Ammaa min mi waɗaay bana non, ngam mi kulɗo Allah.
Nyalaade fuu min taaskitini ngaari ngoori e baali cuɓaaɗi joweego e colli e ɓaawo nyalɗe sappo fuu min taaskitini inaboojam ɗuuɗɗam. Ammaa mi ƴamaay nguure am haa ngomna, ngam kuugal teddani ummaatoore masin.