उ पत्र मँ लिखा रहा: “चारिहुँ तरफ एक अफवाह फइली भइ अहइ। हर कहूँ लोग उहइ बात क चर्चा करत अहइँ अउर गेमेस क कहब अहइ कि उ फुरइ अहइ। लोगन क कहब अहइ कि तू अउर यहूदी, राजा स बगावत क जोजना बनावत रहे अहा अउर इहइ बरे तू यरूसलेम क नगर देवार क निर्माण करत अहा। लोगन क इ भी कहब अहइ कि तू ही यहूदियन क नवा राजा बनब्या।
अउर इ अफवाह भी अहइ कि तू यरूसलेम मँ अपने विसय मँ इ घोसणा करइ बरे भविस्सबक्ता भी चुन लिहा ह: ‘यहूदा मँ एक ठु राजा अहइ।’ “नहेमायाह! अब मइँ तोहका चितउनी देत हउँ। राजा अर्तछत्र इ बिसय क सुनवाई करी तउ हमरे लगे आ अउर हमसे मिलिके इ बारे मँ बातचीत कर।”
हमार दुस्मन बस हम क डेरावइ क जतन करत अहइँ। उ पचे अपने मने मँ सोचत रहेन, “यहूदी लोग डेराइ जइही अउर काम क चलत रखइ बरे बहोत निर्बल पड़ जइहीं अउर फुन देवार पूरी नाहीं होइ पाई।” किन्तु मइँ अपने मन मँ इ बिनती किहेउँ, “परमेस्सर मोका मजबूत बनावा।”
फुन हमार सबहिं दुस्मनन सुनेन कि हम परकोटा बनाइके तइयार कइ लिहा ह। हमरे आस पास क सबहि देसन लखेन कि निर्माण कार्य पूरा होइ चुका ह। एहसे ओनकर हिम्मत टूट गइ काहेकि उ पचे जानत रहेन कि हम इ कार्य हमरे परमेस्सर क मदद स पूरा किहा ह।
अउर उ सबइ लोग मोहसे कहत रहत रहेन कि तोबियाह केतना अच्छा अहइ अउर उधर उ पचे जउन काम मइँ किया करत रहेउँ, ओकरे बारे मँ तोबियाह क खबर देत रहेन। तोबियाह मोका डरावइ बरे पत्र पठवत रहत रहा।