Ak kingemwachi anyun Sanbalat ak Tobia, ak Gesem Marabuindet, ak bunikyok tugul, kelenji, kiateech irimet, ak ma komi ole butot; (ago eng’ betunoto ko kitom ande kereiywek che bo ormarichok;)
ne kigisir kele, Mwaat eng’ bororiosiek, ak komwaei Gasmu ko u noto, kole, Obwati, inye ak Yahudik, ongelel; amu noto ne konok oteech irimet: ak iegu laitoriandenywa, ko u eng’ ng’alechuto.
Ak kiilewen kogeny maotik si kobiit komwaita ng’alek agobo inye eng’ Jerusalem, kole, Mi laitoriat Juda: ak kimwachin anyun laitoriat ko u ng’alechuto. Nyo anyun kiruoch tugul.
Kigisir inendet anyun si konyor melekto amu ng’olyondoni kole si aiyweis, ak ayai ko u noto, ayai tengekto, si kosich ng’alek che yaach che mwaitoi, si kotaama.
Ibwat, ee Kamuktaindennyu, Tobia ak Sanbalat ko u boisionichuchuak, ak ibwat kogeny Noadia chebioset ne ki maotiot, ak maotik tugul, choto che kita imua.
Amu kimi che chang’ eng’ Juda che kiga koyosiechi inendet, amu ki sandetab Sekania weritab Ara; ak kiga kotun werinnyi Jeohanan cheptab Mesulam weritab Berekia.