N ye dugu kalifa n baden Anani ma, ani masadugu kuntigi Ananiya, min ye mɔgɔtilennin ye, n'a be siran Ala ɲa ka tɛmɛ mɔgɔ caaman kan, n y'a koo don olu le bolo.
N y'a fɔ u ye ko Zeruzalɛmu dondaw tena yɛlɛ ni tile ma gwan, o fana bena to ka tugu ka sɔgɔ ni u kɔlɔsibagaw ka baara ma jigi fɔlɔ. Ko dugu kɔnɔ mɔgɔw bena to ka kɔlɔsili kɛ, dɔw k'o kɛ yɔrɔ latigɛnin dɔw la, dɔw k'o kɛ u ka soo daaw la.
O tuma na, ne ka Ala y'a don ne kɔnɔ ko n ka ɲamɔgɔw ni kititigɛlaw ani jama lajɛn k'u jati. Mɔgɔ minw tun kɔnna ka na, olu tɔgɔw be sɛbɛ min kɔnɔ, ne y'o ta ka tɔgɔ minw sɔrɔ a kɔnɔ, olu filɛ nin ye:
Babilɔni masacɛ Nabukodonozɔri tun ye mara nin mɔgɔ minw minɛ ka taga n'u ye jɔnya la a fɛ, n'u kɔsegira ka bɔ jɔnya la ka na Zeruzalɛmu, Zuda mara la, u kelen kelen bɛɛ u ka dugu kɔnɔ, olu tɔgɔ filɛ nin ye,
minw bɔra ni Zorobabɛli ye ani Yesuwa, ni Neemi ani Azariya, ni Araamiya ani Naamani, ni Maridose ani Bilisan, ni Misipɛrɛti ani Bigibayi, ni Neyumu ani Baana. Isirayɛlidenw minw tun kɔgɔra, olu daa filɛ nin ye:
Daa kɔlɔsibagaw cɛma, Salumu kɔmɔgɔw ni Atɛri kɔmɔgɔw, ani Talimɔn kɔmɔgɔw, ni Akubu kɔmɔgɔw, ani Atita kɔmɔgɔw, ni Sobayi kɔmɔgɔw, tun ye mɔgɔ kɛmɛ ni bi saba ni seegi ye.
Sarakalasebaga dɔw fana tun be ten, o ye Obaya kɔmɔgɔw, ni Akɔsi taw, ani Barizilayi taw ye. Barizilayi nin tun ye Galaadika Barizilayi denmuso furu, o la, u tun b'a wele ten.
U ka baaraden cɛman ni musoman mɔgɔ waa wolonwula ni kɛmɛ saba ni bi saba ni wolonwula (7 337) niin t'a la. Dɔnkililabaga cɛman ni musoman mɔgɔ kɛmɛ fila ni bi naani ni duuru fana tun be yi.
Gwatigi dɔw tun ye fɛɛn dɔw di baara kama. Masacɛ ka lasigiden tun ye sanukuru waa kelen (1 000) di, ni filen bi duuru, ani sarakalasebagaw ka fani deen kɛmɛ duuru ni bi saba.
Sarakalasebagaw ni Levi kɔmɔgɔ tɔw, ani daa kɔlɔsibagaw ni dɔnkililabagaw, ani Alabatoso kɔnɔ baaradenw, ni Isirayɛliden tɔw bɛɛ sigira u ka duguw kɔnɔ. Kalo wolonwulanan na, Isirayɛlidenw bɛɛ tun b'u ka duguw kɔnɔ.