Pamarenta'anna kottha Yerusalim bi' sengko' epassra'agi ka tang taretan se anyama Hanani ban ka Hananya, panglimana binteng, sabab Hananya jareya abecce'an dhari oreng laen, tako' ka Pangeran ban ekenneng parcaja.
Sengko' ngoca' ka se kadhuwa jareya, “Bang-labang saketheng Yerusalim buru olle bukka' mon are la seyang, ban kodu etotop sarta epalang pole sabellunna reng-oreng se ajaga mare ngalakone kawajibanna e baja malem. Laen dhari jareya dhari antarana oreng Yerusalim kodu badha se epele epadaddi piket panjaga'an, sabagiyan kaangguy pos-eppos panjaga'an ban sabagiyan pole kaangguy apattrol e sabingkerra bengkona bang-sebang.”
Daddi Allah apareng ilham ka sengko' sopaja sengko' makompol ra'yat ban para pamimpinna ra'yat sopaja bi' sengko' ekennenga bitong menorot dhaftarra silsilana. E bakto jareya sengko' la nemmo catheddanna reng-oreng se mole dha'-adha' kadibi' dhari pambuwangan. Areya' dhaftarra reng-oreng se kasebbut e dhalem catheddan jareya:
Bannya' e antarana reng-oreng buwangan se kalowar dhari propinsi Babil abali ka Yerusalim ban Yehuda, ka kotthana bang-sebang. Reng-oreng jareya la abit badha e pambuwangan e Babil, molae dhari e bakto etawan bi' Rato Nebukadnezar.