Mûrungu nî aatûmîre ndîroothûrania antû amwe na atongeeria baao, na atongeeria ba njûûrî. Ndîrauga o muntû aandîkwe kûrîngana na rûrîîjo rwaawe. Îndî ndîroona yuku rîrîa rîaandîki mariîtwa ja antû barîa baarî bakuuma kîthamîrioone; o muntû na rûrîîjo rwaawe. Mantû jarîa jaarî ku nî jaja;
Antû baba nîbo baarî atongeeria ba barîa baaumîte kîthamîrioone: Zerubabeli, na Jeshua, na Nehemia, na Azaria, na Raamia, na Nahamani, na Modekai, na Bilishani, na Misiperethi, na Bigivai, na Nehumu, na Baanaha. Jaja nî mariîtwa ja mîciî ya antû barîa baacokere kuuma kîthamîrioone:
Nchiarwa cia antû barîa baatwîre ntûûreene ya Kiriathi-jearimu, na ya Kefira, na ya Beerothi baacokere antû magana mûgwanja ja mîrongo îna na bathatû (743).
Îîjî nîyo mîciî ya Alawi barîa baacokere kuuma kîthamîrioone: antû ba mûciî jwa Jeshua na jwa Kadimieli tabo nchiarwa cia Hodeba baacokere antû mîrongo mûgwanja na bana (74).
Nchiarwa cia barîa baakaragia kîûrû; tabo nchiarwa cia Shalumu, na cia Ateri na cia Talimoni, na cia Akubu, na cia Hatita na cia Shobai, baacokere îgana rîa mîrongo îthatû na banaana (138).
Nchiarwa cia mîciî ya antû barîa baaritaga ngûgî kîûrûûne amwe na nchiarwa cia antû barîa baatumîkagîra mûnene Solomoni bonthe baarî magana jathatû ja mîrongo kenda na baîrî (392).
Antû barîa baatûûraga Babiloni ntûûreene ya Teli-mela na ya Teli-harisha, na ya Kerubi, na ya Adoni, o na ya Imeri, batoombîre kûmenyithania këthîra nî baarî Aisraeli nîûntû bataamenyaga biûjûjû biaao.
Antû bau baaumîte kîthamîrioone baarî na nthûûmba cia arûme na cia aka antû ngiri mûgwanja cia magana jathatû na mîrongo îthatû na mûgwanja (7,337). Ningî nî baarî na aka na arûme barîa baainaga; bonthe antû magana jaîrî ja mîrongo îna na bataano (245).
Antû barîa baatongeeretie mîciî îrîa yaaumîre kîthamîrioone nî baaeejanîre into nîûntû bwa waki bwa kîûrû. Mûrûngamîîri wa Aisraeli nî aaeejanîre kilo inyaanya cia thaabu, na mpakûri mîrongo îtaano, (50) cia gûtumîrwa kîûrûûne, na ndwambambio magana jataano ja mîrongo îthatû (530) cia gûtumîrwa nî athînjîri-Mûrungu.
Atongeeria bamwe mîciî ya Israeli nî baaritîre kilo îgana rîa mîrongo îtaantatû na inyaanya (168) cia thaabu, na kilo ngiri îmwe ya magana jaîrî ja mîrongo îtaano (1,250) cia fetha.
Antû bangî ba Israeli nî baaritîre kilo îgana rîa mîrongo îtaantatû na inyaanya (168) cia thaabu, na kilo îgana rîa mîrongo îna (140) cia fetha, na ndwambambio mîrongo îtaantatû na mûgwanja (67) cia gûtumîrwa nî athînjîri-Mûrungu.
Tontû bûû, athînjîri-Mûrungu, na Alawi, na akaria mpingîro, na aini, na antû barîa baaritaga ngûgî kîûrûûne kîa Mûrungu, na antû bangî bonthe ba Israeli nî batûûrîre ntûûreene cia nthîgûrû ya Juda.