Kitononso eng' komostanywa, kosoman bukuitap Ng'atuutigap Kamuktaindet ne Toroor, Kamuktaindennywa eng' kebeberta agenge ne po ang'wan ne po peetuut. Ki ng'aany tengekwogikwak eng' kebeberta age ne po ang'wan ak kolas Kamuktaindet ne Toroor, Kamuktaindennywa.
Ii Kamuktaindet ne Toroor, inyee inyegei; ki iyai kipsengwet, kipsengwet ne po kipsengwet kobooto tuguukwak tugul, ng'wony ak tuguuk tugul che mi olooto, nyanjosyek ak tuguuk tugul che miitei, ak iriibe tuguuchooto tugul ak kolasun lugeet tugul ne po kipsengwet.
Ki igeer ile po iman muguleldanyi eng' taing'ung', ak oyomiskei ak ineendet igoochi ineendet emetap kanaanindet, Hitindet, Amorindet, Perisindet, Jebusindet ak Girgasindet, igoochi emonooto iyotennyi ak kaiyai ng'aleeguk kosulda, amu ii po iman.
Ki ibarte kaboorunoik ak kwang'utik eng' Pharaoh, ak otwogikyik tugul ak piik tugul che po emennyi, amu ki ingen ile ki inyaliil icheek eng' menoteet. Ki igoochigei kainet, nooto ne mi agoi rani.
Ki ipchei nyanjet eng' tainnywa, si kobun icheek kwenutap nyanjet eng' emet ne yaamaat. Ki itoorchi piik che ki isubu icheek rirosyek, ko uu ye ki wiirchin koita peek che kiimeen.
Ki ichoorchigei kogeny tulweetap Sinai, ak ing'alaalji icheek imi kipsengwet, ak igoochi icheek kirwoogutik che lititen, ng'atuutik che po iman, katigonutik che myach ak kayomisutik.
Ki eesyo icheek kogas iit, amata kobwaat kwang'utiguk che ki iyai eng' kwenunnywa, ago ki iuiit kaatinnywa. Eng' ngelelnatennywa kogilewen kiptaiyannywa komut icheek koweekyigei otwoknateet eng' Misiri. Ago ii Kamuktaindet ne ichoboot inyochi kaat, ii myee ak itinye riirge, ii Kamuktaindet ne ma sip konereechi, ak itinye rireenet ne oo, ama imete icheek.
Ee, agot ye kingo kagoyachigei moita ne kitanyi, ak komwa kole ni ko Kamuktaindeng'ung' ne ki imutun imong'u eng' Misiri, anan ye kingo yai tagisyosyek che eecheen,
koma imete icheek eng' surkwen amu rireenosyeguk che chaang'. Ma istoegei paragunnywa peet toloitap pooldet si kondochi icheek eng' ooreet. Ama istoegei icheek toloita ne po maat kemoi, si koboorchi icheek lapkeiyet ak ooreet ne kanyool kobun.
Ki igoochi kogeny icheek laitornatosyek ak pororyosyek che ki ipchechi icheek kobee kebeberwekwak. Ki nam icheek anyun emetap Sihon, emetap laitoryatap Hesbon ak emetap Og laitoryatap Bashan kobunji.
Ki pa anyun lagochooto ak konam emet kobunji, ak iterteer eng' tainnywa piigap emonooto. Chooto ko ki Kanaanik ak inde icheek eunekwak kobooto laitorinikwak ak piigap emet, si koyachi icheek ko uu ye machei.
Ki nam `icheek nganasook che ng'ootaatiin, emet ne akwai, kooriik che nyiitootiin tuguuk tugul che myachen, ak keriingonik che ki kibal, mbareenigap sabibuk, mbareenigap mseituni ak keetiik ng'iisyat che po logoek. Ki am anyun ak kibiyong'so. Kineryo ak ki igaskei eng' myeeindong'ung' ne oo.
Ago ma kasin iit ak ki ingeleljin. Ki wiirta Ng'atuutiguk kotuktoochi patai ak kobar maotiguk che kibaoryanji, icheek kole koweech icheek kobwanjin, ak koyai tagisyosyek che eecheen.
Nooto anyun, ki inde icheek eunegap puunikwak, che kiim icheek. Ago eng' peetuusyegap nyalildanywa, koriirchin. Ki igas eng' kipsengwet, ak ko uu eng' rireenosyeguk che chaang', ko ki igoochi icheek saruunik che ki sar icheek eng' eunegap puunikwak.
Ago kingo kagomuuny, koyai yaityet kogeny eng' taing'ung'. Ki ibagakyi anyun eunegap puunikwak, si kobiit koboi icheek. Ago ye kingo week ak koriirchin, igas eng' kipsengwet, ak ki isaru icheek konyil che chaang' ko uu rireenosyeguk.
Ki ibaoryanji icheek itigon, ile imutyi kogeny Ng'atuutyeng'ung', ago kiboisyee icheek menoteet, ama kas iit ng'atuutiguk, ago ki yai tengekto kongelelji kirwoogutiguk (che ngot koriip chii age tugul kosabe). Kilit oliin ak kouiit kaatinnywa ama cham kogas.
Ki imuitoochi icheek eng' kenyiisyek che chaang'. Ki iteechine icheek Kabuuseng'ung' kobun maotiguk, ago ma cham kogas. Ara ki inde anyun icheek eunegap piigap emotinwek.
Ara anyun Kamuktaindennyo ne oo ne po kamuktaet, ak ko Kamuktaindet ne po kwong'eet, ne riibei arorutyet ak rireenetapkei, amat igeer ile kiy ne ming'in, ng'wanindo tugul ne kaityech ak laitorinikyok, pounikyok, tisiikyok, maotikyok, kwanisyekyok ak piiguk tugul kobooch eng' peetuusyegap laitorinigap Assyria agoi rani.
ama riip laitorinikyok kobooto pounikyok, tisiikyok anan kwanisyekyok Ng'atuutyeng'ung', ama kas iit ng'atuutiguk ak paornatosyeguk che ki ibaoryan agobo icheek.
Amu ma otin eng' laitornatennywa ak eng' myeeindong'ung' ne oo ne ki igoochi ak eng' emet ne paraa ak ko akwai ne ki igoochi eng' tainnywa ama meto poisyonikwak che yaacheen.
Ak rurei emoniito miising' korurchin laitorinik che ki inde koboiywech amu tengekwogikyok. Tinyei kogeny kimnateet koboi poorwekyok, kobooto tuukyok, ko uu ye machei ak kimi pichiindo ne oo.