Ha Mardoquéo oikuaapáma ramo pe ojehumava’ekue, omondoro ijaokuéra, ha oñemonde ao vosa kuépe, ha oity tanimbu iñakã rehe ha oho pe tavapy rehe ojahe’o asy osapukaihápe.
Opaite tetãnguérape ha opaite tekoha og̃uahẽha rupi tetã ruvicha ñe’ẽ ha hembiapoukapy, umi Judaygua oñembyasyeterei, ha ohasa okaru’ỹre, ñembyasy ha jahe’ópe, ha ao vosa kuépe oñeno tanimbu apytépe.
Ha Ester rembiguái kuñataĩnguéra ou omombe’u hag̃ua ichupe, Mardoquéo ojahe’o asyha. Ha tetã ruvicha rembireko ombyasyeterei, ha oguerahauka Mardoquéope ao oñemonde hag̃ua, ha oipe’a hag̃ua pe ao vosa kue, Mardoquéo katu ndoipotái.
Rekirirĩete mba’e ramo ko ára kóvape ñepytyvõ ha salvacion ouva’erã ambue hendágui Judayguakuérape g̃uarã; nde ha nde ru rogaygua katu pemanombava’erã. Ha mávapa oikuaa ndaha’éipa ko hórape g̃uarã oikóra’e ndehegui tetã ruvicha rembireko.
Tereho ha embyatypaite Judayguakuéra Súsape oikóva guive, ha peiko karu’ỹme cherehehápe, ani pekaru ha ani pey’útei mbohapy ára ha pyhare pukukue, ha che, che kuñataĩkuéra ndive aikóta avei karu’ỹme, ha uperire aikéta ahecha hag̃ua tetã ruvichápe amboyke ramojepe pe tembiapoukapy péva ha amano ramo, tove tamano.