Kɛ jɛn wäär ɛ mɔ, /ken kuäär niɛɛn ɛ tɛk, cuɛ ruac lat ɛn ɣöö ba bok in la gɔ̱a̱rkɛ nyin kuäärä diaal thi̱n nöŋ jɛ, kä cua tin ca gɔ̱a̱r rɛy buɔk kuën kuäär.
Ɛ jɛn, cu kuäär cu ruac wëë i̱, “Kä ɛŋu mi gɔaa mi ca lät kä Mɔr-da-kay kɛ kui̱ kä mi cɛ kɔŋ la̱tdɛ?” Kä cu kuaany kua̱r tin la̱tkɛ jɛ ikä jɛ loc wäkɛ i̱, “Thilɛ mi gɔaa mi ca kɔŋ lät kä Mɔr-da-kay kɛ kui̱ kä mɔmɔ.”
Kä cu kuäär kɛ thiec wëë i̱, “Kä ɛŋa mi te rɛy kal?” Ɛn guäth ɛmɔ, Ɣa-man cɛ ben rɛy kal dhɔaar kua̱r bëë ben ruac kɛ kuäär kɛ kui̱ ŋäpä Mɔr-da-kay guäth ŋäpä min ca rialikä kɛ kui̱dɛ.
Inɔ, cu Ɣa-man ben rɛc, kä cu kuäär jɛ thiec i̱, “Ɛŋu mi dëë lät kä ram mi göörä bä ka̱m luth?” Kä cu Ɣa-man rɔɔdɛ thiec wëë i̱, “Ɛŋa mi go̱o̱r kuäär ɣöö bɛ ka̱m luth mi bi leny ni ɣä?”
Kä a bi̱i̱ ɛmɔ kɛnɛ jio̱ŋko̱o̱r ka̱mkɛ läät kua̱r in nhɔk kuäärɛ. Kä a jɛ roony ram min go̱o̱r kuäär kämdɛ luth. Kä a jɛ jak ram ɛmɔ kä ko̱t jɔk jiöŋköör kä a jɛ jälɛ ikä rɛy dɛ̈ɛ̈ni wec. Kä a rueec in nhɔk kuäärɛ ruac i̱, ‘Guɛcɛ min ca lät kä ram in ci kuäär ɛ ka̱m luth?’ ”
Inɔ, cu Kuäär ni Ä-ɣɛ̈c-we-roc Ɣa-man jiök i̱, “Pɛ̈thni, kä naŋ bi̱i̱ kɛnɛ jio̱ŋko̱o̱r, ce̱tnikɛ min ci lat, lätni jɛ kä raan ji̱ Juudh ni Mɔr-da-kay in nyuur thok kal dhɔr kua̱r. A jɛ thil kɛl mi bi kään a /ci lät kä kɛn lät tin diaal tin ci lat.”
Ɛn guäth ɔ, cu Ɣa-man bi̱i̱ kɛnɛ jio̱ŋko̱o̱r naŋ, kä cuɛ Mɔr-da-kay rony kɛ bi̱i̱ kä cuɛ jɛ jak kä ko̱t jɔk jiöŋköör, kä cuɛ jɛ wä jälikä rɛy dɛ̈ɛ̈ni wec a guic nɛy diaal jɛ. Kä cu rueec in nhɔk kuäärɛ ruac, wëë i̱, “Guɛcɛ min ca lät kä ram min ci kuäär ɛ ka̱m luth.”
Mëë ci Ɣa-man ruaacni diaal tëë ci tuɔɔk kä jɛ la̱r ciekdɛ ni Dhɛ-rɛc kɛnɛ mäthnikɛ diaal, cu nɛy tin la luëk kɛ jɛ ruac kɛ jɛ wäkɛ i̱, “Mi ci Mɔr-da-kay ëë moci kɛ rik a raan ji̱ Juudh, /ci gɛ̈mdɛ bi luäŋ, bi rɔ dhil nikɛ pɛn tetädɛ.”