Ọ sị eze, “Dodo, omẹni ọ sụọghọ Agụ, omẹni ọ chọ n'o mẹni m ọhụnma, omẹni ọ hụghọ a mma n'o mẹ ẹ, omẹni ihiẹn m a sụọghọ a, ya ye iwu hụn k'a kagbu hụn Hamanị nwa Hamẹdata onyẹ Agagị ropụha de, hụn wẹ k'e gi gbucharịn ndị Ju ile rị Azụụn ile eze rị a kị.
Ụnụ nwẹn, de ni nwan iwu ọzọ hụn jẹnkọ d'e yeni ndị Ju ẹka; de n'ẹ k'ọ dọn rị mma ẹnya ụnụ. Gi ni ẹfan eze de ẹ, ọnụ e gi ọla mkpịnsịn ẹka eze gi e biye ẹka biye ẹ. Makẹni, w'ara saẹka kagbu ihiẹn wẹ gi ẹfan eze de, gi ọla mkpịnsịn ẹka eze biye ẹ ẹka.”
Ịya kẹ wẹ nọ kpọ ndị akanwe eze ozigbo. Nke akpọhịn ẹtọ kwasị ọgụn imẹ ifọn nke ẹtọ, hụn wụ ọnwan Sivanị kẹ ihiẹnni mẹ. Wẹ nọ detu ihiẹn ile Mọdikaya sị ndị Ju mẹ lẹ hụn ọ sị ndị ọkịkị mẹ, kẹ ndị ile a nọkin ẹnya eze Azụụn ichẹn-ichẹn kẹ ndị gọvanọ kẹ ndị-isi ile rị Azụụn ẹsa kwasị ọgụn-isin eze rị a kị: gha Ndịa d'e rukwọrị Ẹtiopịa. Wẹ nọ gi mkpụrụ-ẹkụkwọ Azụụn ichẹn-ichẹn gi e de ihiẹn deni wẹ ya, gi asụsụ alị ichẹn-ichẹn deni wẹ ya, gizi asụsụ ndị Ju lẹ mkpụrụ-ẹkụkwọ wẹ gi e de deni wẹ ya.
Ẹfan eze wụ Ahazẹrusu kẹ Mọdikaya gi de ẹkụkwọ ndị hụ o zipụ, gi ọla mkpịnsịn ẹka eze gi e biye ihiẹn ẹka biye wẹ ẹka; ọ nọ we wẹ ye ndị ozi gi ẹshin ndị a gba okẹn-ọsọ hụn wẹ zụntọnị eze wejẹnsọnmẹ Azụụn ichẹn-ichẹn.
Ndị ozi hụ gi ẹshin e jẹn nọ nyinrinsọnmẹ ẹshin-ọsọ ndị ahụn wẹ gi e jẹnni eze ozi, gi okẹn-ọsọ pụ, makẹ iwuni eze ti. A hịghọzị wẹ iwu hụ imẹ isi-alị wụ obodo Susa.
Kẹ Mọdikaya gha ebe eze rị pụha, o yihụ ẹwuru ndị-nze nke ọchan lẹ nke bru; o kpuhụ okpu-eze goru hi ogbe; o yihụzị ẹwuru e nwun pọpụ-pọpụ wẹ gi linẹni riẹnni kwa elu. Ndị bi obodo Susa hụ e yi oro, a ghọghọ.
Imẹ Ẹgbẹrẹ ọwụlẹ lẹ obodo ọwụlẹ, ebe ọwụlẹ iwu eze ru, ndị Ju rịn'a hụ a ghọghọ, ẹfọ hụ a sụọ wẹ ụsụọ, wẹ hụ e ri oriri, e mẹ mmẹmmẹ. Ndị bu ọda wụ ndị alị ọzọ nọ họnrin ndị Ju, makẹni egun ndị Ju rị a tụ wẹ.