Ka bɛ ni booni gol’ so Ada la biɛɣ’ pinaata dali daa ti paai, dabisi’ shɛli dali naa zaligu maa ni daa yɛn tum tuma. Dindali maa ka Yɛhudianim’ dimnim’ daa tɛhi ni bɛ ni gari ba yiko ku ba. Amaa ka Yɛhudianim’ maa n-daa lee ti nyaŋ bɛ dimnim’ maa.
Yɛhudianim’ bɛn daa be Naa Ahasivɛrɔs tiŋgbɔŋ maa ni tiŋ’ kam ni daa laɣimmi mali shili gu ni bɛ mini ŋunkam kana ni o ti liri ba zaŋ nya taba. Ka niriba bɛn daa be luɣ’ shɛlikam daa zɔri ba ka so ku tooi zani bɛ tooni.
Hal bɛ tiŋgbɔŋ maa yaɣili kam ni tuma zuɣulaannim’ mini gomnanim’ ni kpambaliba ni bɛnkam zaa daa ʒe nam fukumsi zaashee daa sɔŋla Yɛhudianim’ maa, dama bɛ daa zɔrila Mɔdɛkai.
Hal Haman ŋun daa nyɛ Hamɛdata bia, ka nyɛ Yɛhudianim’ dim’ la bidibisi pia daa be bɛ ni ku ninvuɣ’ shɛb’ maa ni. Bɛ yuya m-bɔŋɔ: Parishandata mini Dalifɔn ni Asipata ni Pɔrata ni Adalia ni Aridata ni Parimashita ni Arisai ni Aridai ni Vaizata. Amaa bɛ daa bi di bɛ nɛma.
Ka naa mi daa yɛli Napaɣ’ Ɛsta, “Susa kɔŋko puuni Yɛhudianim’ kula ninvuɣ’ kɔbisinu, ka Haman bidibisi pia la be bɛ ni. Amii wula ka bɛ lee niŋ n nam sulinsi yaɣ’ shɛŋa din kpalim la polo? Ka pumpɔŋɔ bɔ ka a lee lan bɔra? Ka n ti a li. Suhim’ ma a ni bɔri shɛli, ka n ti a li.”
Ka Ɛsta daa yɛli, “Naa, a yi saɣi, nyin’ chɛ ka Yɛhudianim’ bɛn be Susa ŋɔ sa niŋ bɛ ni niŋ shɛm zuŋɔ ŋɔ biɛɣuni yaha; ka lan chɛ ka bɛ sa zaŋ Haman bidibisi pia la ti yili dari.”
Ka Yɛhudianim’ bɛn be Susa maa daa lan laɣim tab’ bɛ ni booni gol’ so Ada la biɛɣ’ pinaanahi dali n-lan ku ninvuɣ’ kɔbisita tiŋ’ maa puuni pahi. Amaa bɛ daa bi di bɛ nɛma.
Yɛhudianim’ bɛn daa be yaɣ’ shɛŋa din pahi la ni gba daa laɣimmi tuhi fa bɛmaŋa. Bɛ daa tuhi nyaŋ bɛ dimnim’ bɛn je ba maa n-ku bɛ ninvuɣ’ tuhi’ pisopɔinnaanu. Amaa bɛ daa bi di bɛ nɛma.
Dimbɔŋɔ daa niŋla bɛ ni booni gol’ so Ada la biɛɣ’ pinaata dali. Ka dabisi’ shɛli din paya n-nyɛ biɛɣ’ pinaanahi dali, bɛ daa bi lan ku so pahi. Bɛ daa zaŋ dindali maa leela suhupiɛlli chuɣu dabisili.
Amaa goli biɛɣ’ pinaanu dali ka Yɛhudianim’ bɛn daa be Susa puuni maa bɛn’ daa zaŋ leei bɛ Vuhim Dabisili. Bɛ ni daa na kul be bɛ dimnim’ maa kubu ni biɛɣ’ pinaata mini biɛɣ’ pinaanahi dali, ka daa ti chɛ ba kubu la biɛɣ’ pinaanu dal’ la zuɣu.
Di zuɣu n-daa chɛ ka Yɛhudianim’ bɛn be tiŋkpansi zaŋla bɛ ni booni gol’ so Ada la biɛɣ’ pinaanahi dali leei suhupiɛlli vuhim mini chuɣu puhibu dabisili, ka daa niŋ bindira tari taba.
Dabisa ŋɔ n-daa doli bɛ ni daa nyaŋ bɛ dimnim’ dahin shɛl’ la nyaaŋa. Di goli maa n-daa nyɛ goli so puuni bɛ suhugarigu mini bɛ tahima yihibu ni daa ŋmaligi leei bɛ suhupiɛlli saha. Di zuɣu ka Mɔdɛkai daa yɛli ba ni bɛ zaŋm’ di dabisa maa puhimi chuɣu, ka niŋm’ bindira tarimi taba, ka tim’ nandaamba pina.
Hamɛdata ŋun daa yi Agag zuliya ni na bia Haman ŋun daa nyɛ Yɛhudianim’ dim’ la n-daa ti chɛ ka bɛ pihi kuɣa sɔŋ ni bɛ lihi nya, (bee “Pur” kaman bɛ ni daa booni li shɛm) ka ku Yɛhudianima. O daa lomi ni o bahi ba yoli zaa.
Amaa ka Ɛsta daa chaŋ naa sani, ka naa ti zali zaligu, ka chɛ ka bɛ sab’ li sɔŋ ni Haman ni lo nia biɛ’ shɛli zaŋ chaŋ Yɛhudianim’ polo maa simdi ni di ŋmaligi dila ŋuna. Ka bɛ daa zaŋ Haman maa min’ o bidibisi yili gar’ dari.
ka Yɛhudianim’ maa daa zaŋ li leei bɛmaŋmaŋ’ mini bɛ zuliya ni ŋunkam yu ni o zaŋ omaŋ’ leei Yɛhudia nira kali. Ka di saha daa yi ti paai yuuni kam puuni, bɛ puhirila di chuɣu maa kaman di ni wuhi shɛm.
Bɛ daa zaliya ni di saha maa zaŋ chaŋ ʒiɛmana din kanna puuni, Yɛhudia nir’ kam min’ o yiŋnim’ bɛn be tiŋgbɔŋ maa yaɣili kam ni mini tiŋ’ kam ni bɛn’ kul teemi puhimi Purim dabisa chuɣu maa, ka kul niŋmi lala zaŋ chana.
Ka bɛ daa sab’ gbana ti Yɛhudianim’ zaa bɛn daa be Naa Ahasivɛrɔs tiŋgbɔŋ maa yaɣa kɔbiga ni pisinaayopɔin la zaa ni. Gbaŋ maa puuni yɛtɔɣa daa nyɛla Yɛhudianim’ suhudoo mini yɛlimaŋli puhigu.
Ka o daa lan wuhi ba ni bɛ mini bɛ zuliya kul puhim’ Purim chuɣu maa di saha yi ti paai. Bɛ daa yɛn puhiri li mi kaman Mɔdɛkai ŋun daa nyɛ Yɛhudia nir’ la mini Napaɣ’ Ɛsta ni daa wuhi ba shɛm la ni kaman bɛ ni pun doli bɛ kali soli n-lɔri noli, ka mali fabila gba saha shɛm la.