×

Bukuit Ne Tilil 2020

JOB 1

1
Kimi chi eng’ emetab Us, ne kigiguure Job; ak kiigesunotgei chichoto ak ko bo iman, ne kiiywei Kamuktaindet, ak koistoegei yaitio.
2
Kigisikyi werik tisab ak tibik somok,
3
ak tugukyik ko ki kechirek elfusiek tisab, ak tambesik elfusiek somok, ak eik elfut agenge, che bo chogit, ak sigirok che iyuogik bogol mut, ak bik che chang’ che bo gonnyi; ki o anyun chichoto mising’ kosiir bik tugul che bo kong’asis.
4
Ak kibendi werikyik gotab age tugul, eng’ betut ne kigichopchi; ak kiiyokto keguur chepkametisiekwak somok kobwa koamis ak koee koboto ichek.
5
Ak kingogesgei betusiekwak che bo igorta, koyokto Job kianyiny ichek, ak kong’eet karon mising’, ak kogoito kagochinoik che kibeelei ko u koitetab ichek tugul: amu kile Job, Abere kogoyai werikyuk tengek, koesio Kamuktaindet eng’ mugulelwekwak. Kiyaei Job ko u noto kotugul.
6
Kimi anyun betut ye kibwanei werikab Kamuktaindet kotonondos eng’ taitab Jehovah, ak kinyo agine Setani koboto ichek.
7
Ak kilenji Jehovah Setani, Ibunu ano? Kowolji anyun Setani Jehovah, kolenji, Abunu ole awendote eng’ ng’ony, ak ole abunoti eng’ ng’ony.
8
Ak kilenji Jehovah Setani, Koigeer otwogindennyu Job? Amu mami ne kergei ak inendet eng’ ng’ony, ne igesunotgei ak ko chito ne bo iman, ne iywei Kamuktaindet, ak koistoegei yaitio.
9
Kowolji anyun Setani Jehovah kolenji, Tos iywei Job Kamuktaindet buch?
10
Tos ma iyieme ng’otwet inendet koboto gonnyi, ak tuguk tugul che tinyei, eng’ komosta age tugul? Kiiberur boisionikab eunekyik, ak kotesak tugukyik eng’ emet.
11
Ago chuul eung’ung’, ak itwa tuguk tugul che tinyei, si koesien eng’ taing’ung’.
12
Ak kilenji Jehovah Setani, Keero, tuguk tugul che tinyei komi eung’ung’; ametwa inendet kityo. Kwo anyun Setani eng’ taitab Jehovah.
13
Ak eng’ betut ye kiamisiei ak koeei divaik werikyik ak tibikyik eng’ gotab werit ne tupcho,
14
koit ole mi Job chito ne kiga kiyokto, ak kolenji, Kaibatisiei eik, ak kaagete sigirok ole negite ichek:
15
koset Sabeik ak kokweri akwotisiechoto; ee, kagobar otwogik eng’ rotwetab chok; ak kaachilil anege, kanyo amwaun.
16
Ye kita kong’alali, koit agine age, ak kole, Kachorgei matab Kamuktaindet eng’ kipsengwet, ak kagobeel kechirek, ak otwogik, ak koges ichek; ak kaachilil anege, kanyo amwaun.
17
Ye kita kong’alali, koit agine age, ak kole, Kachob Kaldeik kweanaik somok, ak kobok kobwa kokweri tambesik; ee, ak kobar otwogik eng’ rotwetab chok; ak kaachilil anege, kanyo amwaun.
18
Ye kita kong’alali, koit agine age, ak kole, Koamisiei ak koeei divaik weriguk ak tibiguk eng’ gotab werit ne tupcho:
19
ak ogeero, kous usonet ne o kobunu ong’atet ak korieb luukwek ang’wan che bo got, koluulji murenik, ak kagobek; ak kaachilil anege, kanyo amwaun.
20
Kong’eet anyun Job, ak kobet ngoriennyi ne bo barak, ak kocher metinnyi, ak kobutyi ng’ony, kosa:
21
ak kile, Kigisicha ach ngor, ak aweeksei ach ngor: kigonu Jehovah, ak kagoweech Jehovah; iberurot kainetab Jehovah.
22
Ma yai Job tengek eng’ chuto tugul, anan koiityi Kamuktaindet berberiet.
Kalenjin Bible 2020
God's word open for all Bible Society of Kenya, 2020
:
Save Notes