×

Bukuit Ne Tilil 2020

JOB 10

1
Ng’etei sobondanyu eng’ sobennyu; Amwaitoi kang’unyung’ung’ennyu, amasise; Ang’alali eng’ ng’wanindab sobondanyu.
2
Alenjini Kamuktaindet, Ameruokwa; Iborua anyun kit ne kagonin kibelge.
3
Tos mie eng’ inye iusisie, Ak isas boisietab euneguk, Ak iluuchi kiruogetab kiptengeginik?
4
Tos itinye konyek che bo borto, Anan igeere ko u ye keerei chito?
5
Tos kergei betusieguk ak betusiekab chi, Anan u kenyisieguk betusiekab chi,
6
Kot iteeb tengektanyu, Ak iweny chalwoktanyu,
7
Agot ngingen ile ma a chi ne ya; Ama mi ne imuchi kosor eng’ eung’ung?
8
Kiyaa euneguk ak komimia; Ago kegesua inye.
9
Asain ale ibwat ile, kiimimia ko u menet; Ak igetyina ng’ung’unyek kogeny?
10
Tos ma irong’wa ko u chego, Ak iyaa aek mugunikab chego?
11
Kiilaakwa iririot ak banyek, Ak ituiya eng’ kowek ak simoloik.
12
Kiigona sobondo ak chamet, Ak kigorib rutochineng’ung’ tamirmiriennyu.
13
Ago kiiung’e tuguchoto muguleldang’ung’; Angen ale mi nito koboten:
14
Ngot ayai tengek, igeera, Amenyoiywa kaat agobo tengektanyu.
15
Ngot ko a ya, bwa eng’ ane; Ak ngot a bo iman, ko mayote metinnyu; Amu kagonyiia kalilanet Ak ageere nyalildanyu.
16
Ak ngot koeetgei metinnyu, isapchina ko u ng’etundo: Ak iboruage kogeny eng’ kwong’et.
17
Iyae baoriniguk agobo ane koleelagitu, Ak itesyina neregeguk; Mi kobota lugosiek che mawalatigei.
18
Kilya anyun si ichamde kesicha? Kita mie ame, si mageera chi.
19
Kita aegu chito ne kima kota biitu; Kita kimutena moet awa kererit.
20
Tos ma ng’ering’ betusiekyuk? Sis anyun, Ak ibagakta, si anyor kagaigaet kitigin,
21
Kotom awe ole ma aweeksei, Emetab mesundeito ak uruetab meet;
22
Emetab mesundeito ne o, ne u mesundeito; Ne bo uruetab meet, ne matinyei ng’atut age tugul, Ak ole u lapkeiyet mesundeito.
Kalenjin Bible 2020
God's word open for all Bible Society of Kenya, 2020
:
Save Notes