×

Fɔs Oli Baybul 2013

Job 10

1
A dɔn taya wit layf; a go lɛ PAPA GƆD no wetin de na mi at fɔ am; lɛ i no aw mi at de blid.
2
A go tɛl PAPA GƆD se, mek i nɔ se a gilti; lɛ i mek a no wetin a du rɔŋ.
3
Us bɛnifit yu de gɛt fɔ trit pɔsin bad, fɔ pwɛl yu yon wok ɛn lɛf bad pipul fɔ du wetin dɛn wan du?
4
Yu de luk tin naw lɛk aw mɔtalman de luk tin? Ɔ na aw mɔtalman de ɔndastand, yu de ɔndastand naw?
5
Yu layf shɔt naw lɛk mɔtalman, ɔ yu nɔ de liv lɔŋ lɛk mɔtalman,
6
we mek yu de fɛn fɔlt pan mi ɛn se a dɔn sin,
7
ivin we yu no se a nɔ du natin rɔŋ, ɛn pɔsin nɔ de we go pul mi na yu an?
8
Na yu mek mi aw a tan; bɔt naw, yu wan tɔn bak ɛn dɔnawe wit mi.
9
Nɔ fɔgɛt se na dɔti yu tek mek mi, Yuwan mek a tɔn dɔti bak?
10
Noto yu tɔn mi insay mi mama bɛlɛ lɛk milk, ɛn mek a tɔn lɛk chiz?
11
Yu kɔba mi bon wit flɛsh ɛn kanda afta yu dɔn mek mi bon ɛn mɔsul go usay dɛn fɔ de.
12
Yu gi mi layf ɛn sho mi lɔv we nɔ de chenj; ɛn na dis lɔv mek a de te tide.
13
Bɔt yu nɔ mek a no wetin de na yu at; a bin no se yu de plan difrɛn tin dɛn fɔ mi.
14
Yu bin de wach mi mek a nɔ sin, so dat if a sin, yu go se a gilti.
15
If a de du bad, mek a alaki! If a du wetin rayt sɛf, a de shem fɔ dat, bikɔs na soso disgres de mit mi, ɛn a de tink bɔt aw a de sɔfa.
16
If a du ɛnitin we fɔ mek a gladi, yu de fɛn mi lɛk layɔn fɔ dɔnawe wit mi, ɛn ivin de pafɔm mirekul we kin mek a sɔfa;
17
yu de fɛn difrɛn we fɔ atak mi, ɛn de vɛks vɛks pan mi; ɛn plan nyu we fɔ atak mi.
18
Wetin mek yu mek a bɔn? A wish a bin dɔn day bifo ɛnibɔdi si mi,
19
lɛ i bi lɛk a nɔ bɔn kam na wɔl sɛf, bikɔs dɛn bɛr mi as a bɔn so.
20
Na shɔt tɛm nɔmɔ a gɛt fɔ liv. Lɛf mi to misɛf mek a gɛt alafia
21
bifo a go na di land we na soso daknɛs ful de ɛn nɔ kam bak,
22
di land we nɔ gɛt ɔda, usay layt nɔ de, na dak di ples dak nɔmɔ.
Krio Bible 2013
Krio Bible The Bible Society of Sierra Leone, 2013
:
Sev Notis dɛn