×

現代台語譯本羅馬字版

約伯記 11

1
Ná-má -lâng Só-hoat ìn Iok-pek kóng:
2
Lí kóng kah chiah chōe, kiám m̄-bián kā lí ìn? Ōe kóng chōe kiám chiū ū-lí?
3
Lí teh o͘-pe̍h tián, lâng kiám tio̍h ho̍k lí? Lí teh kā lâng thí-chhiò, kiám bô lâng kā lí chek-pī?
4
Lí kóng: Góa ê tō-lí chèng-khak, góa tī lí ê gán-tiong chheng-pe̍k.
5
Chóng-sī goān Siōng-tè kóng-ōe, khui-chhùi hoán-pok lí,
6
goān I chí-sī lí tì-hūi ê ò-pì, in-ūi tì-hūi ū kúi-nā khoán chok-iōng. Tio̍h chai, Siōng-tè bô sǹg lí lóng-chóng ê chōe-kò.
7
Lí kiám ōe-tàng bêng-pe̍k Siōng-tè ê ò-pì? Lí kiám ōe-tàng thiat-tóe liáu-kái Choân-lêng-chiá?
8
I ê tì-hūi pí thiⁿ khah koân, lí ōe-tàng chòe sím-mi̍h? Pí Im-kan khah chhim, lí ōe-tàng chai sím-mi̍h?
9
I ê tì-hūi pí tōe khah tn̂g, pí hái khah khoah.
10
I keng-kè ê sî, kā lí lia̍h--khí-lâi; I khui-têng sím-phòaⁿ, siáⁿ-lâng ōe-tàng kā I chó͘-tòng?
11
In-ūi I chai siáⁿ-lâng sī hu-ké; I khòaⁿ-tio̍h siâ-ok kiám ōe khòaⁿ-chòe bô iàu-kín?
12
Iá-lû chhut-sì nā ōe koai-sūn, gû-gōng ê lâng mā ōe ū tì-hūi.
13
Lí nā choan-sim gióng-bōng Siōng-tè, gia̍h-khí chhiú tùi I kî-tó;
14
lí nā pàng-sak lí ê chōe-kò, bô iông-ún siâ-ok tòa tī chhù-lāi;
15
hit-sî, lí chiū ōe-tàng m̄-bián kiàn-siàu, hó-táⁿ biān-tùi sè-kài.
16
Khó͘-thàng lí ōe lóng bōe-kì--tit, chhin-chhiūⁿ chúi lâu--kè lóng siau-sit.
17
Lí ê it-seng ōe pí ji̍t tiong-tàu khah kng-bêng, àm-mî pìⁿ-chòe chhin-chhiūⁿ chá-khí-sî.
18
Lí ōe an-ún, in-ūi ū ǹg-bāng; lí ōe tit-tio̍h pó-hō͘, thang an-sim hioh-khùn.
19
Lí tó--teh bōe siū heh-kiaⁿ, koh ū chin chōe lâng lâi kiû lí pang-chān.
20
Chóng-sī pháiⁿ-lâng ê ba̍k-chiu ōe sit-bêng; in bô lō͘ thang tô-cháu, in ê ǹg-bāng put-kò sī chòe-āu chi̍t-kháu-khùi.
Chinese TTVR
The Bible Society in Taiwan
:
保存笔记