×

Ika Bible 2018

Jobu 13

1
“Ẹnya m a hụngụọ ihiẹnni ile, ntịn m a nụgụọ a, ghọta a!
2
Zofa, a marịnghọ m ihiẹn ụnụ marịn. Ụnụ akanị m mma.
3
Kanị Onyẹ Hụ Nwọn Ikẹn Ile kẹ m chọ nwan nị m gwa oku; Chuku kẹ m chọ nị mmẹ lẹ ịya kin.
4
Nke ụnụ, ụnụ rịhụ e kpumẹ ezioku ụnụ marịn; ndị idibiẹ marịnlẹni ọrụn kẹ ụnụ ile wụ!
5
Omẹni ụnụ te k'a gbachanrịn nkịtịn — nkẹ wẹ sị nị ụnụ e nwọnghọ uche.
6
Nụ nị nwan ihiẹn m rị a dọ; gọn ni ntịn ihiẹn m rị e kin.
7
Nị ụnụ tụdẹ nwan ntụ nị ụnụ rị e kudọnni Chuku ra? Nị ụnụ gi ntụ kun'ẹ ọnụ a?
8
Ụnụ k'e gbeyedẹn'ẹ ra? Ụnụ k'e kindẹni Chuku ọnụ a?
9
Ọ jụ ụnụ ukwere ẹ, nị ụnụ hụn isi pụha?! Nị ụnụ s'ẹka tụ a ntụ kẹ w'a tụ ịhịan ntụ?
10
Chuku k'a jụgbọrịrị ụnụ, omẹni ụnụ rị a tụ ntụ n'o ri eṅẹn.
11
Ọghọ rị a ẹhụ erọnkọ ụnụ egun? Egun ẹ e bukọ ụnụ ri?
12
Itẹn ile ụnụ rị a kpa wụhụ ntụn; Ikpe ụnụ rị e kin ezekarịnị ite-ụrụa.
13
Gba nị nkịtịn nị m ku, ihiẹn k'e mẹni m ya mẹ m nwan.
14
Ni m bu enwẹn m che eje-ọnọdị; nị m bu ndụn m che ọb'ẹka.
15
Ọ sụọn'a n'o k'e gbu m, m k'e gikwọ a tan dọn ẹnya; m k'e kinkwọ tan ọnụ m ihun ẹ.
16
M k'e gidẹ ẹ nwọn nzụọpụha, ebe o mẹ ni onwọnni eje-ịhịan egun a nị a bịa ebe ọ rị!
17
Gọn ni m ntịn ọhụnma; ihiẹn m rị e ku ya ban ụnụ ntịn.
18
Hụnnị m rotọgụ ihiẹn m k'e kin, a marịnghọ m nị m k'e ri eṅẹn.
19
Onyẹ k'a s'ẹka sị nị ọnwan wụ njọ m mẹ? Omẹni o nwọnghọ, e kpumẹ m ọnụ, nwụnhụn.
20
“Chuku, dodo, mẹni m ihiẹn ẹbụọnị sụọ, amamgbe m'a warịn'ị:
21
Ha m ẹka ukun, y'e mẹbehi ihiẹn ndịnị ị rị e gi e rọn m egun;
22
kpọ m nwan ikpe, m k'a za ị mọbụ y'a nị m ku, n'ị shịarị.
23
Mmẹfie ole lẹ njọ ole kẹ m mẹ? Ghọsị m mmẹfie m lẹ njọ m.
24
K'ị bupunini m ihun, e mẹ m kẹ eṅẹnrẹn i?
25
N'i mẹshi ẹhụhụọ ufere bukọ ikẹn? N'i chụ ẹfịfịa ọkpọ-nkụn ọsọ?
26
Ị hụdẹ e detusọnmẹni m ihiẹn jọgbu enwẹn ẹ, e gi njọ ndị m mẹ kẹ m rị okoro e sọn m.
27
Y'a kpọma m ụkụ ẹbụbụọ, e gi ahịma i yi m ọb'ụkụ e sọn m, e ke m nke ebe-lẹ-ebe m jẹnlẹ.
28
Ịhịan hụ a la iwi nọkẹ ihiẹn rehini, nọkẹ ẹkwa ẹkịka ri.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes