×

Fɔs Oli Baybul 2013

Job 13

1
Bo, a dɔn si ɔl wetin de bi so bifo, ɛn a dɔn yɛri ɛn ɔndastand ɔl wetin una dɔn se.
2
A no ɔl wetin una no. Una nɔ pas mi o.
3
Bɔt a go tɔk to di Ɔlmayti, A wan agyu mi kes wit PAPA GƆD
4
As fɔ una, una jɛs de kɔba tin we una nɔ ɔndastand wit bɔku bɔku lay; una na lɛk dɔkta we de gi mɛrɛsin we nɔ de mɛn.
5
If una sɛt una mɔt, pipul dɛn go fil se una na pipul dɛn we gɛt bɔku sɛns.
6
Una lisin mi agyumɛnt ɛn wetin mi de aks se fɔ bi.
7
Wetindu una de lay fɔ PAPA GƆD ɛn wetindu una de lay gi mi?
8
Una de tray fɔ tɔk fɔ PAPA GƆD? Una go ebul tɔk fɔ PAPA GƆD?
9
Una fil se una go fri if PAPA GƆD chɛk una layf, ɔ una fil se una go lay gi am lɛk we una kin lay gi mɔtalman?
10
I lɛk una ayd una badat PAPA GƆD go mɔs pɔnish una fɔ wetin una dɔn du.
11
Una go fred am bikɔs i gret ɛn pawaful.
12
Una parebul dɛn jɛs tan lɛk asis, ɛn una agyumɛnt wik lɛk kle.
13
Una sɛt mɔt mek a tɔk; ɛnitin we gɛt fɔ bi to mi, mek i bi.
14
A rɛdi fɔ ɛnitin, ivin if a gɛt fɔ risk mi layf.
15
A nɔ bisin bɔt natin igen na dis wɔl, bikɔs a no se PAPA GƆD gɛt fɔ kil mi, bɔt a go tɛl am wetin de na mi at.
16
Na we a gɛt maynd fɔ tɔk to am mek i go sev mi, bikɔs bad pipul nɔ go gɛt maynd fɔ tinap bifo am.
17
Una lisin gud wetin a de se, ɛn lɛ i de na una ed.
18
A dɔn rɛdi fɔ tɔk fɔ misɛf ɛn a no se a go klia mi nem.
19
Udat go go tinap agens mi pan dis kes, na yu PAPA GƆD? If na yu, a go jɛs fɔgɛt bɔt ɔltin ɛn day saful.
20
A wan lɛ yu du tu tin fɔ mi, If yu du dɛn fɔ mi, a go rɛdi fɔ go tinap bifo yu fɔ yɛri wetin yu gɛt agens mi.
21
Wan, yu fɔ lɛf fɔ pɔnish mi, ɛn tu, nɔ mek a fred yu bikɔs yu fiaful.
22
So yu fɔs tɔk to mi ɛn a go ansa ɔ mek mi fɔs tɔk lɛ yu ansa.
23
Wetin ɛn wetin na di bad tin dɛn we a dɔn du ɛn a wan no if mi sin dɛn bɔku; lɛ a no mi sin dɛn we a dɔn kɔmit ɛn di bad tin dɛn we a dɔn du.
24
Wetindu yu de push mi kɔmɔt nia yu, ɛn wetindu yu de trit mi lɛk se mi ɛn yu na ɛnimi?
25
Yu de tray fɔ mek a fred yu, mi we tan jɛs lɛk lif bifo yu? If yu atak mi, i go jɛs tan lɛk we yu atak brumtik.
26
Di bad tin dɛn we yu tɔk se a du, mɔna mi; yu ivin tɔk bɔt di bad tin dɛn we a bin du we mi na bin yɔŋbɔy.
27
Yu chen mi fut ɛn de wach ɔl usay a de go, ɛn ivin de wach wetin a de du ɛn aw a de du an.
28
Na dat mek mɔtalman de wes lɛk tin we rɔtin, lɛk kot we mɔth kin dɔn it.
Krio Bible 2013
Krio Bible The Bible Society of Sierra Leone, 2013
:
Sev Notis dɛn