|
| 1 |
|
| “Oni ngere, bangire bi agi apai re dunduko, Ture gi he ki rugu tihe na ni. |
|
| 2 |
|
| Gu pai ini oni, mi ini kina ha a; pa re aumba nga susi roni te. |
|
| 3 |
|
| Mi kpi nyemu ka fura na gu Ko du na tandu apai dũ, mi kpi nyemu ka ringbisa pa gi ngbanga fu Mbori. |
|
| 4 |
|
| Ono tipa roni, oni nga atonapa zire, oni dunduko du wa agu abinza angba nga ya. |
|
| 5 |
|
| Ako, ka oni ongo aonga dunduko, si ka du ni gaoni tatamana! |
|
| 6 |
|
| Oni gí gi bera pa apai awere, ki ye turoni ka gia gi kpe zungaditise. |
|
| 7 |
|
| Oni agúmba irairapai tipa Mbori, ki gumba pai fu ko ni nangahe? |
|
| 8 |
|
| Oni akpára pa ko rogo gaoni beta, ki mbakadi pai tipa Mbori? |
|
| 9 |
|
| Pai ángba fu roni ho ko ka gbata pa gaoni apai ni? watadu oni rengbe ka nanga ko wa boro nananga kurani? |
|
| 10 |
|
| Ko azá roni aza ni rengo, ka si du wa oni akpara pa aboro ni gbuko. |
|
| 11 |
|
| Gako dukuripai agúndesi nga roni na kiki ko ati nga ti roni a, te? |
|
| 12 |
|
| Gaoni tingiditingidi berãpai ki du wa gu sanza nga ga kuke. Gaoni nyanyaki agbata ki ngia kina agbata pere. |
|
| 13 |
|
| “Oni óngo kii, ki mbu re mi fura, gu pai ki ye fere wa si akpi nyemu he. |
|
| 14 |
|
| Tipagine ka mi moi borore ti ni ku ngbare yo, ki di ungare ku bere? |
|
| 15 |
|
| Oni ngére, ko aímo re; mi adu nga na maabangirise te; pai ti ni te, mi ambákada gimi apai ku bara bangiriko. |
|
| 16 |
|
| Gere adú ni gi bata a, nga gu boro zanga sinombori ni ayé nga ku bara bangiriko te. |
|
| 17 |
|
| Oni gí fugore wenengaĩ, gi taka pande pa apai du turoni yo, |
|
| 18 |
|
| Oni ngi re, mi rugu pa gi ngbanga; mi ini he i nikasapa ngbanga fere. |
|
| 19 |
|
| Da nga gu ni nikadarã pai na mi? Ka boro du ho si ka mi ongo ti ni ki kpi. |
|
| 20 |
|
| Mo ídi nga pa apai ue fere, si du mi ka oka nga kpakpure ti ni ti ro ya: |
|
| 21 |
|
| mo dí bero ti re tuturũ; ka kiki ro fú nga gunde fere ya. |
|
| 22 |
|
| Mo ayamba he, mi akaraga pai; watadu mo mbú re mi fura, mo ki karaga pai fere. |
|
| 23 |
|
| Waĩ du bange gimi irairaapai na gi ingapai? Mo yúgu pa gi samungu fere mi ini he na pa gi ingapai. |
|
| 24 |
|
| Tipagine mo naoka kpakpuro ti ni, ki gedi re wa vuraro? |
|
| 25 |
|
| Mo afúda yaya kpe ki do fuo ugu kakarika? |
|
| 26 |
|
| Bambiko mo nake kere nirãnirãpai kuti re, ki ya mi di mosoro ga parangare irairapai. |
|
| 27 |
|
| Mo namaa ndure a ku rogo angboro, ki nikparia pa gimi agene dunduko; mo nagba gene kirikiri pati re tipa kpandure. |
|
| 28 |
|
| Mi du wa zirĩhe nanyasa anyasa, wa gu roko riti ayawe he.” |
|
|
|
|