1
Job katu ombohovái, ha he’i:
2
Koichagua ñe’ẽ hetaitereíma ahendu, peẽ chemoangapyhy rãngue, peẽ chemyangekõive pehóvo.
3
Ndopamo’ãi piko pene ñe’ẽ rei térãpa mba’e penembopochy pembohovaive hag̃ua.
4
Che ikatuva’erãmo’ã añe’ẽ peẽicha avei, peẽ peime rire che rendaguépe, che ambohasava’erãmo’ã avei ñe’ẽ iporãva penderehe, ha penderehe añeakãmbovava ñembohorýpe.
5
Che aime rire pene rendaguépe che juru rupi che pomokyre’ỹ ha che ñe’ẽ rupi che pomoangapyhyva’erãmo’ã.
6
Añe’ẽ ramo che mba’asy ndopimo’ãi, ha akirirĩ ramojepe che ñembyasy ndacherejamo’ãi.
7
Ko’ág̃a katu Ñanderuete chemokangypa, ha tĩndyhápe opaite cherayhúva oñemomombyrýma chehegui.
8
Ha’e chejopyete ha che mba’asy oñe’ẽvai cherehe ku techahare ijapúvaicha.
9
Ñanderuete pochy chepehẽ’ambáma, Ha’e oñemoĩ cherehe, ku mymba ñarõvaicha omopururũ cherehe hãinguéra; cherehe ndaija’éigui oikutu hesakuéra cherehe.
10
Ojejurupe’a joa hikuái cherehe, che rova api hikuái ñemotĩme, cherehe opu’ãmbaite hikuái.
11
Ñanderuete chemoĩ kuimba’e ivaíva pópe, ha chereity tekove ñaña poguýpe.
12
Py’aguapýpe aikova’ekue, upéi katu Ñanderuete chembosa’ipa, chejapyhy che atúagui chepehe’ãmba hag̃ua ku mymba ñarõ ojapo háicha hembi’urã rehe.
13
Opáguio ihu’y cheapi, Ha’e ombokua che pitikiri’ĩnguéra ha ndohechaukavéima iporiahuvereko. Ha’e oñohẽ che ruguy yvýre.
14
Hatã ojejapi che retére ha chemuña peteĩ soldádoicha.
15
Añembyasýgui añemonde ao vosa kuépe ha amoinge che akã yvy timbópe.
16
Cherasẽitereígui che rova irurupa, ha che ropepikuéra rehe ojehecháma ñemano’ã,
17
che po rehe jepe noĩri aña reko, ha che ñembo’e ipotĩ ramojepe.
18
Nde, che retã yvy, ani reñomítei che ruguy ha oĩ’arã che sapukái asy rendag̃ua.
19
Eikuaa porãke, amo yvágape oĩ che rechahare, ha che pytyvõhára oiko yvatehápe.
20
Che irũnguéra oñembohory cherehe, Ñanderuete renondépe katu añohẽ che resay.
21
Ñanderuete tombojovake porã ñande apytépe ha tohechauka mávapa ojavy, che, térã che irũnguéra.
22
Mbovymi áño hemby chéve g̃uarã, ojepapáma (che ára) ha che aháta pe tape mamógui ndajumo’ãvéimagui.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015