×

Ika Bible 2018

Jobu 16

1
Jobu nọ sị:
2
“O tekẹ m nụma ihiẹn ndị nọ ẹnịna; ndị nrọkọ-obi ndụn gụ kẹ ụnụ ile wụ!
3
Oku ụnụ suegbu enwẹn ẹ nwọnlẹni isi ebikọ? Kị rị e mẹ ụnụ, ụnụ gi tọ a dọ ihiẹnni?
4
Mmẹ nwẹn nwọnzikwọ ikẹn ku kẹ ụnụ, omẹni ụnụ te rị ọnọdịnị m rị; nkẹ m'a sazịkwọ ẹka gi oku rịgbu enwẹn ẹ mma ma ọnụ ikpe, finfinni ụnụ isi.
5
Kanị, obi kẹ mmẹ nwẹn nkẹ a kasị ọnụ; nkẹ m'a gwa ụnụ oku k'a rọkọ ụnụ obi, mẹ ẹhụ fuyezi ụnụ.
6
M ku oku, ihiẹn rị a tụrụnị m ebelụakọ; m gba nkịtịn, ọ kụsịkọ.
7
Euu Chuku, y'e mẹgụọ ẹhụ ghanahịn m; y'e tikpọgụọ ezi-lẹ-ụlọ m ile.
8
Y'e kẹnmẹgụọ m — gi ẹ a shịagbu m ẹri; ẹhụ m fie hụzị nwan a shịagbu m ẹri.
9
Chuku hụ a maye m, e gi ọnụma a dọrinriẹn m, e rini m nkwẹnrẹn-eze; onyẹ iwe m hụ e bu eje-ẹnya a tụma m.
10
Wẹ hụ e wo m; a ma m ọra mkpari, e zuni m umẹ.
11
Chuku e wegụọ m che ẹka ndị-ejẹ; ọ tụgụọ m ye ẹka ndị ẹfọ jọ.
12
Ihiẹn ile te hụ m mma, ọ nọ kụkpọpụchanrịn m; ọ nwụndọn m olu, gwekpọ m. O bugụọ m tumẹ a gba m hụ ụta;
13
ndị a gban'a ụta e fihunmẹgụọ m. Ọ hụ e zupu m akụnrụn — omikẹn arịa, ọ gbagụọ olulu m a ye alị.
14
Ọ hụ a maye m, ọmaye-ọmaye; ọ zụnburu m nọkẹ onyẹ-agha.
15
Ẹkwa-achọ wẹ gi a kwan ụya a nyanrịngụọ m ẹhụ; ọghọ m rị nwan alị.
16
Ẹnya m a changụọ yeni ẹkwan; ẹnya m e funchanrịngụọ;
17
bụ onwọnni eje-ihiẹn rị m ẹka, m hụzịkwọ e gichanrịn obi m ile e mẹ ekpere.
18
Alị-ee! Ekpumẹkwọlẹ ẹdeke m; anịkwọlẹ wẹ zuemẹ ẹkwan m!
19
“K'osilẹrị, ọshẹri m hụkwọ nwan elu-igwee; onyẹ e kinni m ọnụ m rị elu.
20
Ndị ọwụ m hụ a mụgbu m hụnnị m rị a kwan ẹnya-mirin a kpọku Chuku.
21
Euu, onyẹ hụn k'a rịọdọnni ịhịan ebe Chuku rị kẹ ịhịan dọn a rịọdọnni ọwụ a!
22
Makẹni ọ họdụ nwan ahụa ole, e jẹnmẹ m ebe wẹ ghalẹni a lụaha.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes