×

WẼNNAAM SEBRE 2014

Zoob 16

1
A Zoob leokame yaa:
2
«Mam wʋma bũmb wʋsg sẽn wẽnd woto. Yãmb fãa yaa bɛlsdb sẽn namsd nebã.
3
Yãmb leoka maam: ‹Gom-bãmbã sẽn yaa wa sebgã na n sɛɛ dabʋre? Bõe n yikd fo sũur f leokrã pʋga?›
4
Sã n dag n yaẽ yãmb n be mam zĩigẽ wã, mam me rag n na n gomẽ-la yãmb gom-toaag a woto, la m na n girẽ-la m zug y toogã yĩnga.
5
Mam me rag n na n gomame n paas-y raoodo, la m noor dag na n yiisa belsg goam y yĩnga.
6
Mam sã n gomda, ka boogd m toogã ye. La m sã n sĩnd n ka gomd me, a ka loogd n bas-m me ye.
7
Moasã, kayto! Wẽnnaam kɩtame tɩ m pãng sɛ, bãmb waa ne sãoong m zakã fãa pʋgẽ.
8
Yãmb sẽn kɩt tɩ mam yĩngã yõbã kɩta kaseto, n mongd maam bʋʋm. Mam faagrã yik n bʋʋd ne-ma.
9
Bãmb zendma maam b sũ-puugrã pʋgẽ n zab ne maam. Bãmb wãbda b yẽn ne maam. M bɛyã gẽenda maam ne beem.
10
Bãmb yaagda b noy hãbbb... ne maam, n dat n maan maam wẽnga, la b pãbd-m pegse. Bãmb tigimda taab n zabd ne maam.
11
Wẽnnaam dɩka maam n bas ne kom-bãoonego, b rɩka maam n ning nin-toos nugẽ.
12
Mam dag n zĩi ne yam-gãnega, la bãmb dĩmsa maam, bãmb gãda mam yubl n kaoog maam. Bãmb tilga maam n na n tees n tãoodẽ.
13
Bãmb pɛɛmã yita zĩig zãng n tat maam. Bãmb kõsa maam tɩ kẽ hal pʋgẽ n ka zoe mam nimbãaneg ye. Bãmb daaga mam yamã tẽnga.
14
Bãmb kõsa maam n po võy wʋsgo. Bãmb zoet n kẽeda maam wa tãb-biiga.
15
Mam sẽe bot n yeelg m gãongã zugu, la mam fõgna m neng tẽnga.
16
Mam yãbame hal tɩ m ninã mooge, mam nin-pagdã modame n mum wa kũum.
17
Mam nusã yaool n nan zɩ n maan ned pãng ye. Mam pʋʋsda Wẽnnaam ne pʋ-peelem.
18
Bɩ tẽn-gãongã ra yũ m zɩɩmã ye! Bɩ mam kelemsã sãd n yi tɩ b wʋme!
19
Sẽn sɩng ne moasã, mam tara kaset soab sẽn be yĩngri, mam tara ned m sẽn tõe n teeg saasẽ.
20
Mam zo-rãmbã paoogda maam, la mam yãbda nintãm n boond Wẽnnaam.
21
Bɩ ned ning mam sẽn teegã wa yɩ zab-paas ninsaal ne Wẽnnaam sʋka, la ninsaal ne a to sʋka.
22
Bala, mam yʋʋmã sõor kolga sɛɛbo, tɩ m na n tog sor n ka lebg n wa ye.»
Mossi MPBU 2014
Moore Bible Bible Society of Burkina Faso, 2014
:
Save Notes