×

BIBELE 1951

Jobo 16

1
Jobo a fetola a re:
2
Taba tša mohuta woo ke di kwile gantši; bohle le bahomotši ba go tena motho.
3
Dipolelo tša lefela a ga di a fela bjale? Goba o pelofala ka lefe ge o mphetola?
4
Ge lena le ka be le dutše fa bakeng sa ka, le nna nka be ke bolela boka lena, nka be ke le dika ka merero, ka ba ka le kwera.
5
Nka be ke le tiiša ka molomo wa ka, ka le hleka ka mabobo a melomo ya ka.
6
Fela, le ge nka bolela, bohloko bja ka ga bo okobale; ge nka homola, ga go na se se kago ntloga.
7
Ka kgonthe, bjale o ntapišitše. Ba ga ka bohle o ba šwalalantše.
8
Ge o ntirile wa mašošo, ke bjona bohlatse. Ge bohloko bo ntsogela, ke gona ge bo mpega bo lebane le nna.
9
Bogale bjago bo nkgagotše, bo nthipagantše, bo nthathanyetša meno; naba la ka le ntomelela mahlo.
10
Ba nkahlamela, ba mphasola thama ka mahlapa, ba rapana ge ba nkwela.
11
Nna Modimo o nkgafetše bakgelogi, o ntahletše mo atleng tša babe.
12
Ke be ke dutše ke thabile, mme a nthobaganya; a ntshwara ka molala mme a mpšhatlaganya; o ntirile wa maelo a gagwe.
13
Dibetša tša gagwe di mpharafara gohle; o nthutše pshio, ga a ntlhomogele; sabohloko sa ka o se tšholletše fase.
14
O nkgobaditše mme a boeletša; o nkitimela wa mogale.
15
Ke tatetše mmele wa ka mankgeretla; lenaka la ka ke le bea fase leroleng.
16
Mahlo a ka a hubetše ka go lla; ke širwa mahlo ke thiti ya lehu.
17
Etšwa atla tša ka di se ne borumolane, mme thapelo ya ka e se ne bosodi.
18
Hee mobu, se khupetše madi a ka; mokgoši wa ka a o se hwetše makhutšo.
19
Tsebang e sa le bjale; hlatse ya ka e legodimong; Khumedi ya ka e gona kua tletlolo.
20
Bagwera ba ka ba a nkwera, mme mahlo a ka a llela Modimo megokgo,
21
gore a boelanye motho le Modimo, le ngwana motho le wa gabo.
22
Gobane nywaga e sa go tla ga e nene; ke mo ke tlogo wela tsela ke se hlwe ke boa.
Sotho Bible 1951
Bible Society of South Africa 1986
:
Boloka Lintlha