×

Biblia alo Ŋɔŋlɔ Kɔkɔe 1913

Hiob 18

1
Tete Suaxtɔ Bildad ɖo ŋu gblɔ bena:
2
Ɣekaɣi miawɔ nyaʋa ase ɖo? Midze nunya gbã, emegbe hafi miaƒo nu!
3
Nukaŋuti wobu mí lãwoe, eye míenye bometsilawo le mía ŋku me?
4
Tsiã, wò amesi vuvu wò ŋutɔ ɖokuiwò le wò dɔmedzoe me, wò tae anyigba azu aƒeɖo, eye woate agakpe ɖa le eteƒea?
5
Ke ame vɔ̃ɖi ƒe akaɖi tsina, eye eƒe dzoƒaɖe meklẽna o.
6
Kekeli doa viviti le eƒe agbadɔ me, eye eƒe akaɖi tsina le eta me.
7
Eƒe afɔ legbe ɖeɖe tona ɖe eme, eye eya ŋutɔ ƒe adaŋudede ƒunɛ anyi.
8
Elabena wonyãnɛ wòtsɔa eƒe afɔ dea ɖɔ me, eye wòzɔa mɔ̃ka dzi.
9
Adoboli miãna ɖe afɔkpo dzi nɛ, eye mɔ̃ka ɖenɛ.
10
Wotrea ƒoɖetoe nɛ, eye wolia eƒe mɔ̃ de etoƒe.
11
Ŋɔdzidodowo doa dzikatsoƒoe nɛ, eye woyɔnɛ de nu kplikplikpli.
12
Eƒe dzɔgbevɔ̃e tsia dɔmeɣee de eŋu, eye gbegblẽ nɔa klalo de exa.
13
Eƒe ŋutilã ŋu nuwo duduna, eye ku ƒe ŋgɔgbevi ɖua eƒe ŋutilã ŋu nuwo.
14
Woaɖee ɖa le eƒe agbadɔ, si ŋu wòle ŋu ɖom ɖo la me, eye nu akplɔe aƒu fia dziŋɔla.
15
Nusi menye etɔ o la, nɔa eƒe agbadɔ me, eye wokɔa aŋɔ ɖe enɔƒe.
16
Eƒe kewo kuna ɖe to me, eye eƒe alɔwo yrɔna ɖe dzi me.
17
Womeɖoa ŋku edzi le anyigba dzi o, eye eƒe ŋkɔ buna le ablɔ me.
18
Wotua asii tsoa kekeli me dona ɖe viviti me, eye wonyãnɛ ɖa le xexeame.
19
Vi alo tɔgbuiyɔvia ɖeke manɔ esi le eƒe dukɔ dome o, eye amea ɖeke makpɔtɔ ɖe enɔƒe o.
20
Ɣetoɖoƒetɔwo ƒe nu aku le eƒe ŋkeke la ŋu, eye ɣedzeƒetɔwo ƒe tame able fu.
21
Alea nu madzɔmadzɔ wɔla ƒe nɔƒewo nɔna, eye alea amesi ŋlɔ Mawu be la, ƒe teƒe nɔna.
Ewe Bible 1913
Bible in Éwé Revised Version Bible Society of Ghana, 1913, 2006
:
Save Notes