×

Bukuit Ne Tilil 2020

JOB 18

1
Kiwol anyun Bildad Suindet kole,
2
Oriiche mestonok agobo ng’alek kot kotianit? Obwat, ye ibata keng’alal.
3
Amu nee si kiitech kele ki tiong’ik, Keng’wonegitu eng’ taing’ung’?
4
Inye ne igererige eng’ neregeguk, Tos kimetoi ng’ony agobo inye? Anan kiistoi ruandet eng’ komostanyi?
5
Ee, kimisi lapkeiyetab kiptengegeginik, Ama kokweng’sei liblibenetab mannyi.
6
Imenitu lapkeiyet eng’ emainnyi, Ak kimisi tainnyi ne mi baragunnyi.
7
Kisagiti tiegutikab kimnatennyi, Ak kowirtoi inendet kiruogennyi.
8
Amu kigowirji kelyekyik inendet mestet ne u regereiywot, Ak wendote mestonok che kigituch.
9
Namei mestetab borowet kwariandennyi, Ak namei inendet mestet ne bo karik.
10
Kagiuny eng’ ng’ony mestetab rogoet agobo inendet, Ak keringet ne kagiuny eng’ oret agobo inendet.
11
Igochin kamuisosiek inendet koiyweis eng’ komosta age tugul, Ak koonat inendet kot koriich.
12
Amei rubet kimnatennyi, Ak chobot nyalilda konach inendet.
13
Amei kebeberwekab bortanyi, Amei taita ne bo meet, kebeberwekyik.
14
Kitutu inendet eng’ emainnyi ne kiimang’u; Ak kimutyi laitoriatab kamuisosiek.
15
Menyei emainnyi kit ne ma nenyi: Kiseere meng’otennyi koik che laldos.
16
Yaamdos tigitikyik eng’ orit, Ak keeb temennyi eng’ barak.
17
Lusei kabwatennyi eng’ ng’ony, Ama nyoru kaina eng’ oret.
18
Kionei eng’ ole mi lapkeiyet kwo mesundeito, Ak keon eng’ ng’ony.
19
Manyoru inendet werit anan mochogoret eng’ bikyik, Ama ng’etyin chi eng’ ole menyei.
20
Kwong’dos eng’ betunnyi icheget che biitu let, Ko u ye kiiyweis che kiindou.
21
U noto iman meng’otosiekab che ma bo iman, Ak nito ko komostab inendet ne maingen Kamuktaindet.
Kalenjin Bible 2020
God's word open for all Bible Society of Kenya, 2020
:
Save Notes