×

Ika Bible 2018

Jobu 19

1
Ya Jobu nọ sị,
2
“Nanị kẹ ụnụ e yebiehandẹ m nwan afụnfụn, e gi ọnụ e mẹ m?
3
Mgbe iri kẹ ụnụ kparipụ m; ụnụ hụ a maye m! Ifẹnrẹn arịdẹ nwan ụnụ ẹnya ra?!
4
Omẹni m te kpahudẹ akpahu, mkpa m rọ, ẹlẹ oku ụnụ.
5
Omẹni ọ rị ụnụ nke imẹkarị enwẹn ụnụ ebe m rị, nke igi ụya m rị e ri a kpari m,
6
marịn nị nwan nị Chuku wụ onyẹ hụn mẹ m eje-ihiẹn, dọ ọnyan-ọga a kpu m.
7
Ọsụọn'a nị m hụ e yi, ‘E mẹgụọ wẹ m eje-ihiẹn!’ Onwọnni onyẹ a zanị m; m hụ a hị nị wẹ yeni m ẹka onwọnni onyẹ a hannị m eṅẹn.
8
O gbukingụọ m ụzọ makẹ m'a s'ẹka gha; o mẹgụọ ụzọ m gba ishi.
9
Ọ napụgụọ m ọghọ m, wepụ m okpu-eze isi.
10
Ọ hụ a kụ m ihiẹn azụụn ile kẹn'ọ kụtuchanrịn m; ọ bụpụgụọ ihiẹn m te gi dọn ẹnya nọkẹ osisi.
11
Ọ hụ e gi olulu e sọn m; a gụn m e yeni ndị-iṅẹnrẹn ẹ.
12
Ndị-agha a a bịagụọ d'a maye m lekẹ obodo; a tụnhunmẹgụọ wẹ mkpọnyin w'a nọ maye m; e tumẹgụọ wẹ ọdụ-agha wẹ ghahunmẹ ebe m bi.
13
O kebegụọ mmẹ lẹ umunẹ m; ndị te marịnnị m amarịnzị m kaka.
14
Ndị ebọn ẹnyi a lagụọ m tọ; ndị ọwụ m a zọgụọ m.
15
Ndị a bịa iwe m lẹ idibo m ikpoho hụ e mẹ m kẹ onyẹ wẹ marịnlẹni, e mẹ m kẹ otumunyẹ.
16
M kpọ odibo m, ara zazị m, ọsụọn'a nị m gi ọnụ m rịọ a.
17
Ọnụ m rịdẹ nwan e shintụ nwunyẹ m; m rịdẹ nwan e ze ụmụ ẹfọ nnẹ m ize.
18
Ụmụ-ẹka rịzịdẹ nwan e legberi m — m pụha, a mụma wẹ m.
19
M rị nwan e ze ndị te wụ ezigbo ọwụ m ize; onyẹ m gi e mẹ ẹhụ e bugụọ nụmanị m.
20
Akpụkpọ-ẹhụ lẹ ọkpụkpụ sụọ họdụ m ẹhụ; ndụn m sụọ họdụ.
21
Mẹ ni omikẹn m, ndị ọwụ m, mẹni ni m omikẹn, makẹni ẹka Chuku e mẹọlẹ m ihiẹn.
22
Kị ụnụ rị a chụnị m kẹ Chuku dọn rị a chụ m? Hụn ụnụ mẹpụ m eke hi ụnụ?
23
K'ọ rị m e detu wẹ ihiẹn m rị e ku, de wẹ yedẹ imẹ ẹkụkwọ,
24
gidẹ igwe lẹ igwe-lẹdi detu wẹ mọbụ ka wẹ ye elu ọmụma — nị wẹ rịsọnmẹ jẹnrin-ejẹn!
25
A marịnghọ m nị Onyẹ Agbapụhanị m rị ndụn, n'o k'e wuzo elu-ụwa ogẹn ikpanzụụn;
26
nị ọsụọn'a nị akpụkpọ-ẹhụ m la iwi, m k'e gikwọ ẹhụ m hụn Chuku;
27
mmẹ lẹ enwẹn m k'a hụn a; ẹnya m kẹ m'e gi hụn a — mmẹ, ẹlẹ onyẹ ọzọ. O d'a gụngbu m!
28
Ikẹnkwọ ụnụ sị, ‘Kị ẹnyi k'e mẹzi ẹ cheni hụn ẹnyi mẹ ẹ, ebe o mẹni ịya buhẹ nsọngbuni?’
29
Ka tụkwọ nị nwan egun ọpịa Chuku, makẹni o gi ọnụma sọn ụnụ, ọpịa k'o k'e gi ye ụnụ afụnfụn — ya kẹ ụnụ e gi marịn nị okinkin-ikpe rị arị.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes