×

Ika Bible 2018

Jobu 21

1
Ya kẹ Jobu nọ sị,
2
“Gọn ni ntịn oku m ọhụnma-ọhụnma — gọn ni m ntịn nị ndụn ban m.
3
Nwọn ni ndidin nị m ku, m kugụ, ụnụ a mụmazị m ẹmụ ụnụ rị a mụ m.
4
M rịdẹ e kinghọsị ịhịan ra? Kị m'e nwọnmẹzini ndidin?
5
Lee ni m ẹnya, nị ụnụ jụsọhị, gi ẹka kụmachanrịn ọnụ.
6
M ro ihiẹnni, egun a tụma m, ẹhụ a mama m nni.
7
Kị haịn ndị-ejẹ gi a tọ, a ka ẹgẹdi, e mẹwaye okẹn-ịhịan?
8
W'a hụnzịdẹ ụmụ wẹ kẹ wẹ rị a ban ihiẹn idẹnya wẹ; w'e gidẹ ẹnya a hụn ụmụ-ụmụ wẹ.
9
Onwọnni ihiẹn emẹ ikpụnọ wẹ, egun ara tụ wẹ; onwọnni ihiẹn Chuku e mẹ wẹ.
10
Okẹn-efin wẹ ara gbabehi: ọmụmụ-ọmụmụ kẹ efin wẹ a mụ, imẹ ara kwọn wẹ.
11
Wẹ ara tụ egun idupụha ụmụ wẹ nọkẹ igunrun-ewu; ndị ntịtị rị imẹ wẹ e tẹnhunmẹ egu.
12
W'a bụdẹ ẹbụ, a kụye ẹ ẹgede-chakachaka, a kpọdẹ ụbọ wẹ; w'e gbuzikwọ ẹkpịrị, a ghọghọ.
13
Ọ masịzịkwọnị wẹ amasịnị elu wẹ ile; ẹhụ e fu wẹ e rudẹ imẹ ili.
14
Bụ wẹ hụ a sị Chuku, ‘Ha ẹnyi ye!’ ‘Onwọnni ihiẹn ẹnyi gi ịmarịnn'ị e mẹ!’
15
‘Onyẹ wụdẹ Onyẹ Hụ Nwọn Ikẹn Ile, hụn ẹnyi e gi femẹ ẹ?’ ‘Elee erere k'ọ bannị ẹnyi nị ẹnyi rị e mẹ ekpere e jẹnn'ẹ’?
16
Kanị ẹlẹ ẹka wẹ mẹni wẹ; ya wụ, a jụ m ihiẹn ndị eje-ịhịan rị e ro.
17
Mgbe ole kẹ ukpẹ ndị eje-ịhịan e tinyụndẹ nwan? Mgbe ole kẹ okẹn-ihiẹn e kunrundẹ wẹ? Mgbe ole kẹ Chuku e gidẹ olulu e mẹ wẹ eje-ihiẹn?
18
Elebe kẹ wẹ nọdẹ a rị kẹ ẹfịfịa ọkpọ-nkụn ufere bukọ mọbụ ifunfun ihiẹn okẹn ufere e bupụ?
19
W'a sịzị nị, ‘Ụmụ eje-ịhịan kẹ Chuku e butọnị afụnfụn njọ a.’ Ya gi ẹ sọn onyẹ ahụn lẹ enwẹn ẹ, n'ọ marịn!
20
N'o gi ẹnya a hụn ntikpọ ya lẹ enwẹn ẹ; n'ọ rarị ọnụma Onyẹ Hụ Nwọn Ikẹn Ile.
21
Ọ nwụnhụngụ, k'o k'e romẹzini ikpụlọ a, hụn ogẹn gụnahịngụ a?
22
Onyẹ k'a kuzimẹ nwan Chuku ihiẹn o k'e mẹ, ebe o mẹni ịya e kindẹ ndị kachanrịnnị ikpe?
23
“O nwọn onyẹ ẹhụ a rị ikẹn o we nwụn, ẹhụ fu ẹ, onwọnni ihiẹn egun e gi tụ a —
24
ẹhụ rị a mma, ọkpụkpụ a ze eze.
25
Hụn ẹbọ nwụntọ imẹ ụya — onwọnni ogẹn o gi hụn ihiẹn rị mma.
26
Wẹ ẹbụbụọ e fiẹnrin imẹ ili, ọhọrị a kpụ uwẹ ẹbụbụọ.
27
“M marịnchanrịn ihiẹn ụnụ rị e ro, ihiẹn ụnụ romẹni m.
28
Ụnụ sị, ‘Elebe kẹ ụlọ okẹn-ịhịan ahụn rị nwan? Elebe kẹ ụlọ ndị hụ ndị-ejẹ bi rị nwan?’
29
Ụnụ e ke jụtu ndị e jẹnpụnị ụtaa? Ụnụ e ke gọntu ntịn akịkọ w'a kọ —
30
nị Chuku e dọnmẹzi eje-ịhịan ndụn ogẹn ihiẹn-ikẹn, nị ọ zụọpụha a azụọpụha ụhụọhịn ọnụma?
31
Onyẹ kẹ egun a nị a jụgbọ a idẹnya a? Onyẹ kẹ egun a nị mẹgwarị eje-ịhịan ihiẹn o mẹ?
32
W'e lidẹ ẹ ọhụnma, e che ili ẹ nche.
33
Ẹjan ọdanmgbugbu wẹ liye ẹ a sụọdẹ ẹhụ a ụsụọ; ịhịan ile e sọn ozun ẹ, igunrun wẹ ghalẹni as'ẹka a gụn e burun'ẹ ụzọ.
34
Nanị kẹ ụnụ e dọn nwan gi oku nwọnlẹni isi rọkọ m obi? Ihiẹn ile ụnụ rị e ku enwọn ihiẹn ọ wụ karị ntụ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes