×

Ñanderuete Ñe’ẽ Porã 2015

23

1
Job ombohovái jevy ha he’i:
2
Ko ára kóvape añe’ẽ py’a ñembyasýpe, ipo chemokangypáma, upévare che pyahẽiterei avei.
3
Mba’éichatamora’e aikuaa moõpa ajohukuaa Ñanderuetépe, ag̃uahẽ hag̃ua hendápe.
4
Che ha’éta ichupe aiko hague hekoitépe ha ndareíri ajahéi Ñanderuete rehe.
5
Che ahenduse mba’épa ombohováita chéve ha aikuaase mba’épa he’íta.
6
Oñorãirõnepa chendive ipu’aka reheve. Nahániri, ha’e ojapysakáta uvei cherehe.
7
Upépe pe heko porãva oñemoĩ porã hendive, ha ojepoíta pe heko potĩva imbojovakeháragui.
8
Peikuaa porãke che aha ramo kuarahyresẽ gotýo, ndajohumo’ãi ichupe; ha aha ramo kuarahyreike gotýo ndahechamo’ãi avei ichupe.
9
Ha’e ohechaukárõ ipu’aka yvate gotýo, ndahechamo’ãi ichupe; ha ojere ramo yvy gotýo ndajohumo’ãi avei ichupe.
10
Ha’e katu oikuaa porã che rekove raperã. Ha’e chera’ã (cheprova) ramojepe chepotĩta óroicha.
11
Che aguata ipypore ári, aguata hapére ha ndapiái.
12
Ñanderuete juru he’íva guive ajapo ha iñe’ẽ añongatu porãve che py’apýpe che ánga rembipotágui.
13
Ha’énte noñemoambuemo’ãi, Ha’e oipotáva guive katuete ojapóta avei, avave ndojokomo’ãi ichupe.
14
Umi mba’e Ha’e ojaposéva che rekovépe Ha’e omboaje avei ha upéicha katuete oĩ hetave mba’e ipy’apýpe ojaposéva.
15
Upévare che añemondýi henondépe, ajepy’amongetávo (apensávo) hese aryryipa.
16
Ñanderuete omyangekõi che py’apy, ha pe Ipu’akapáva chemopy’andýi.
17
Che jehasa asy ndachereitýi yvýre; Ñanderuete chemboguata háicha katu, chemyangekõiete ha chereity yvýre.
Guarani Bible 2015
Ñanderuete Ñe’ẽ Porã MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015
:
Guardar notas