×

WẼNNAAM SEBRE 2014

Zoob 24

1
Bõe yĩng tɩ Pãng-Soabã ka yãk bʋʋd wakate? Bõe yĩng tɩ bãmb nebã ka mi a daarã?
2
Nin-wẽns sersda pʋt todse, la b kãagd neb a taab rũms n wãbendẽ.
3
Bãmb deesda kɩɩbs bõens ne pãnga, la b reegd pʋg-kõor naaf n tɩgd gãnegd samd yĩnga.
4
Bãmb digda naong rãmb n yiisd sor zugu. Bãmb weoogda tẽngã nimbãan-dãmb tɩ b soondedẽ.
5
Gese, bãmb sãta beoog n kẽnd we-raoogã pʋgẽ wa we-bõens n baood rɩɩb n na n paam n dɩ la yaa tẽn-nabd-koɛɛngã pʋg la b baood rɩɩb n na n tɩ kõ b kamba.
6
Bãmb wʋkda yamd b sẽn bas pʋt pʋsẽ. La bãmb yãgsda tɩ-biis sẽn ket nin-wẽns pʋt pʋsẽ.
7
Yʋngo, bãmb gãee bɛɛla. Bãmb ka tar fu-gobs n na n pil waood wakat ye.
8
Saag pãbda bãmb tãms zutu. Zĩ-kẽedg kaalem yĩnga, bãmb tɩ soondeda pĩisã seesẽ.
9
B fãsgda kɩɩb a ma bĩisrẽ ne pãnga. Bãmb deesda naong soab bũmb n gãneg a samd yĩnga.
10
Bãmb kɩtdame tɩ naong rãmb kẽnd bɛɛl n ka tar fut ye. La b kɩtdẽ tɩ b tʋkd ka-gĩn tɩ kom tar-ba.
11
La b kɩtdẽ tɩ b be yãg pʋsẽ n wõt oliiv kaam, la b wẽkd reezẽ reezẽ wẽkr koglgẽ, tɩ ko-yũud yaool n tar-ba.
12
B wʋmda neb sẽn dat n ki wõosg tẽngã pʋgẽ. Sẽn pogl-b rãmbã wiisg rãamd zẽkdame, la Wẽnnaam ka kelgd bãmb pʋʋsgã ye!
13
Nin-wẽns n be beenẽ n kɩɩsd vẽenemã. Bãmb ka bãng vẽenemã soay ye. La bãmb ka tũ a so-bugsã zut ye.
14
Nin-kʋʋd yikda tõd-beoogo, n kẽng n tɩ kʋ naong soab ne nimbãan-neda. La yʋngo, yẽnda wẽnda wagdre.
15
Nin-yoaad gũuda zĩ-sobdo, la a tagsdẽ tɩ ned ka na n yãnd-a ye. Yẽnda rɩkda peend n pil a nenga.
16
Yaa lik-bida wã pʋg la wagda wã pood rotã. La wĩntoogo, bãmb sora b rotẽ. Bãmb ka mi vẽenem ye.
17
Nin-bãmbã fãa geta be-vẽegr wa kũum n wate. Bala, bãmb minima lik yɛla.
18
B yetame: Koom na n peega nin-wẽng looge t'a tẽngã lebg kãab-wẽnga. Nebã ka leb n dabd nin-bãmb reezẽ pʋtẽ ye.
19
War ne tʋʋlg sẽn kʋɩɩsd koom to-to wã, kũum me na n looga ne yel-wẽnã soab a woto.
20
Bãmb ma yĩmda b yelle, la zũnzũy rɩt-b lame. B ka tol n leb n tẽeg b yell ye. Nin-wẽng pãng sãama wa tɩɩga.
21
Bãmb fãada pʋg-kiir sẽn ka tar biiga. Bãmb ka maand pʋg-kõap neer ye.
22
Baoosgo, Wẽnnaam pãngã sẽn kɩtd tɩ nin-toosã menema yikame, la nin-bãmb ka tõe n leb n vɩɩmd ye.
23
Wẽnnaam kõta bãmb vɩ-bãane, la bãmb dag n teega bõn-kãnga, la Wẽnnaam ket n geta bãmb tʋʋmã.
24
Bãmb paamda zẽkr wakat bilf pʋgẽ, la bãmb ka leb n be ye. Bãmb lʋɩtame, bãmb daarã tata a tɛk wa nebã fãa. Bãmb kũkd n lʋɩɩ wa b sẽn kẽbg ka-zugu.
25
Sã n ka woto, ãndã n tõe n kɩɩs maam? Ãnda n tõe tɩ mam goamã yɩ zaalem?
Mossi MPBU 2014
Moore Bible Bible Society of Burkina Faso, 2014
:
Save Notes