×

Ekitabo Erikwera 2008

Yobu 24

1
Ahabw'enki Ow'obushoboorozi bwona atarataireho bunaku bw'okucweramu orubanja; kandi ahanki abamwesiga batakamanyaga obwo bunaku?
2
Reeba, abantu bakuura ebibyairwe ebirikubaatanisa, banyaga amasyo bagariisa.
3
Bafunya endogoya y'otaine ishe, bakwatiriza ente y'omufaakazi.
4
Babinga abakyene omu muhanda; abooro b'omu nsi boona beeshereka.
5
Reeba, bashohora kwehenenga nk'enturegye z'omu ishwa; nibasherura eki baraitire omu ihamba kuba eky'okurya ky'abaana baabo.
6
Barundaana omu ishwa obunyaatsi bw'amatungo gaabo, kandi bahumba omu musiri gw'emizaabibu y'enkozi y'ebibi.
7
Baraara entangaare, bataine ki beeshwekire, kandi tibagira ky'okwefubika omu mbeho.
8
Bajubibwa enjura y'omu nshozi, beekinga omu mabaare babuzire obwegamo.
9
Hariho abashahura omwana otaine ishe naakyonka; bakakwatiriza omwereere w'omuntu omworo.
10
Bagyendagyenda bari entangaare, bataine ki bajwaire, beekorera ebiba baine enjara.
11
Bakamuurira amajuta g'emioliva omu misiri yaayo ey'enkozi z'ebibi; kandi banyuukira viino omu manyuukiro gaabo baine eiriho.
12
Omu rurembo abarikufa batsinda, n'abahutaaziibwe baborooga, ngu babahe emikono; kwonka Ruhanga tayeta ha kutaka kwabo.
13
Hariho abanga omushana, abatamanya mitwarize yaagwo; abeetantara emihanda yaagwo.
14
Omwitsi aimuka omu kairima kwita omworo n'omukyene; kandi nyekiro aba omushuma.
15
Eriisho ry'omushambani ritegyeereza orwita-waabo. Naagira ati: Tihariho orandeebe; kandi ayehindura okundi aha maisho.
16
Nyekiro bafumura amaju, nyomushana beekingirana, tibamanya ei omushana gutaaha.
17
Manya boona oku batura, omwirima ndindindi gubabeera nk'akasheeshe, ahabw'okuba baba bamanyiriire ebyagwo ebirikutiinisa.
18
Imwe nimugira ngu bahiminturwa juba omwegyemure, ngu omugabo gwabo omu nsi n'omukyeeno, ngu tihariho munyuuki wa viino oza omu misiri yaabo y'emizaabibu.
19
Ekyanda n'ekibiga ky'omushana nk'oku bihwereza orubaare, n'okuzimu owa Nyamuteza nikwo ehwerekyereza abasiisi.
20
Ab'omu rurembo na baanyinabo babeebwa, amaziina gaabo gaba gatakiijukwa; bariibwa enyogori, bahwerekyererera kimwe. Kutyo okutahikiirira nikwo kurihendagurwa nk'ekiti.
21
Barya eby'engumba etakazaarahoga, kandi tibagira ki bagasira omufaakazi.
22
Kwonka Ruhanga ahabw'amaani ge abagumyaho; ku baba baayehwaire amatsiko, baimuka.
23
Ruhanga abarinda, baba buhooro, kwonka aguma ataire eriisho aha mitwarize yaabo.
24
Bamara akaanya abantu nibabateera eigundu, bwanyima bahanguura. Bagarurwa aha nsi, baihwa omu muhanda nk'abandi boona, bagyeshwa nk'obushiisha bw'engano.
25
Ku kiraabe kitari kityo, n'oha oraanyomesereze ngu nimbeiha, akagira ngu ebi ngamba ni busha?
Nyankole Bible 2008
The Bible with Apocrypha in Runyankore-Rukiga, new revised joint translation The Bible Society of Uganda, 2008
:
Save Notes