×

Ika Bible 2018

Jobu 27

1
Ya Jobu nọ kumẹzi ihiẹn ọ rị e ku, sị,
2
“Ma Chuku hụn jụ n'ọ hankọnị m eṅẹn; ma Onyẹ hụ Nwọn Ikẹn Ile hụn ye m ụyanị m rị e ri:
3
ebe m rị ndụn, ebe m rị e kun uzun Chuku ye m,
4
ụgb'ọnụ m ekukọ eje-ihiẹn, ire m atụkọ ntụ.
5
Ekwerikọ m nị ụnụ rị e ku ezioku; e we m nwụn, ekwerikọ m nị m mẹ njọ.
6
M k'a tọ e ku ẹ nị ẹka m rị ọchan, ekuhutọkọ m ọnụ; ịhọrị m amakọ m ikpe e we m nwụn.
7
Ihiẹn e mẹ ndị-ejẹ ya mẹ ndị-iṅẹnrẹn m, ihiẹn e mẹ ndị-njọ ya mẹ ndị iwe m!
8
Makẹni onyẹ ghalẹni a tụ egun Osolobuẹ enwọnzi ihiẹn o kwọndọn ẹka wẹ weriọlẹ ndụn a, Chuku napụọl'a ndụn a.
9
Nị Chuku gọndẹ nwan ntịn ẹkwan a ogẹn nsọngbu?
10
Ihiẹn Onyẹ Hụ Nwọn Ikẹn Ile a sụọzị a? N'ọ sazị ẹka kpọku Chuku ogẹn ile?
11
M k'a kuzi ụnụ kẹ ikẹn Chuku nọ; ezuemẹkọ m uche Onyẹ Hụ Nwọn Ikẹn Ile.
12
Kanị, ụnụ ile e gigụọ ẹnya ụnụ hụn ihiẹnni. Kị wụzị nwan okuni ile nwọnlẹni isi ụnụ rị e ku?
13
“Lee ni ihiẹn Chuku e keye eje-ịhịan, ihiẹn Onyẹ Hụ Nwọn Ikẹn Ile e ye onyẹ ghalẹni e mẹ omikẹn:
14
Kẹ ụmụ a bulẹ ọda ru, ọpịa-agha e gbu wẹ; ụmụ a ahụnkọ rijun ẹfọ.
15
Eje-ọrịa e feni k'e gbu ndị bikin ugbẹ ẹ, inyẹnmẹ wẹ hụn wẹ nwụnnahịn akwankọ wẹ.
16
Ọsụọn'a n'o kpọntọ siliva kẹ ẹjan, kpọn ẹkwa jun nọkẹ elumelu ụrụa,
17
ndị e bi kẹ Chuku chọ k'e yi ẹkwa o kpọntọ, ndị ẹka wẹ rị ọchan k'e keri siliva a.
18
Ụnọ ọ tụn ezekarịnị ụlọ akpụkpa, o zekarịnị ọdụ onyẹ-nche tụnrụnhụ.
19
Ọdanfịn k'ọ wụ k'o dinẹ imẹ uhinhin — onwọnni ihiẹn mẹ ihiẹn ẹ, kanị ọ shịapụ ẹnya ụtụntụn, wẹ ile a lagụọ.
20
Egun e buru ẹ kẹ mirin; ẹbi a jụrụ a imẹ abalị.
21
Ufere ọwụwa-ẹnyanwụn e buru ẹ, nke ẹ a gụ; ọ zapụ a ọnọdị a,
22
e fe ẹ ikẹn-ikẹn ebe ọ gbakọ ọnwụn-ọnwụn n'ọ wanahịn a.
23
Ufere ahụn hụ e gi ẹ e gu egu, a mụ a ẹmụ; ọ hụ e bupụ a ọnọdị a, a zụn ụzụn kẹ onyẹ rị a ma ọsụa (ọsụọ).
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes