×

Fɔs Oli Baybul 2013

Job 27

1
Job bigin tɔk bak. I se;
2
“Wans PAPA GƆD we dɔn tek mi rayt, de, di Ɔlmayti we dɔn mek mi layf bita;
3
wans mi blo blo de insay mi, ɛn PAPA GƆD in spirit de insay mi;
4
a nɔ go tɔk bad tin ɛn a nɔ go lay gi nɔbɔdi.
5
A nɔ go ɛva tɔk se una rayt; te a day, a nɔ go lɔs mi rɛspɛkt.
6
A go kɔntinyu de waka tret na layf ɛn natin nɔ go mek a chenj; natin nɔ de we a du na layf we a go gɛt fɔ se a sɔri.
7
“Lɛ wetin mit wikɛd pipul dɛn mit mi ɛnimi dɛn, ɛn lɛ wetin mit pipul dɛn we nɔ de waka tret, mit di wan dɛn we de fɛt mi.
8
Wetin pipul dɛn we nɔ no PAPA GƆD go abop pan we PAPA GƆD tek dɛn layf, we dɛn day?
9
PAPA GƆD go lisin am we i kray to am we trɔbul mit am?
10
I go de gladi bɔt di Ɔlmayti in biznɛs? I go de pre to PAPA GƆD ɔltɛm?
11
A go tɛl una bɔt PAPA GƆD in pawa, ɛn a go tɛl una wetin di Ɔlmayti plan.
12
Tɔk am go tɔk am kam, unasɛf no bɔt ɔl dat, so wetindu una ɔl de tɔk nɔnsɛns?
13
“Na dɛn tin ya PAPA GƆD kin mek mit wikɛd pipul, ɛn dɛn pipul we de mek dɛn kɔmpin nɔ ɛnjɔy dɛn layf:
14
If i gɛt plɛnti pikin, na wa dɛn ɔl go day, ɛn dɛn nɔ go de gɛt it fɔ it.
15
Di wan dɛn we wa ɛn aŋri nɔ kil, na siknɛs go kil dɛn, ɛn di uman dɛn we dɛn day lɛf sɛf, nɔ go munin fɔ dɛn.
16
I lɛk i gɛt bɔku kɔpɔ lɛk dɔti, ɛn payl plɛnti klos lɛk kle;
17
i go gɛt dɛn fɔ natin; na pipul we waka tret wit PAPA GƆD go wɛr dɛn, ɛn na pipul dɛn we dɛn an klin go sheb in kɔpɔ.
18
Di os we i bil tan lɛk spayda wɛb; i tan lɛk gyadpost we gyadman kin tinap.
19
Ɔl in mɔni go de we i de go slip, bɔt na fɔ di las tɛm; we i wek, ɔl in mɔni go dɔn go.
20
I go fred bad bad wan lɛk we ebi ebi wata kin rɔn; da briz we de wisul go kɛr am go na nɛt.
21
Da briz we de kɔmɔt na di ist go tot am ɛn i dɔn go; i swip am kɔmɔt nain os.
22
I nɔ sɔri fɔ am we i de tot am; i tray fɔ rɔnawe.
23
I grip am wit in tu an ɛn sɔktit pan am frɔm usay i de.
Krio Bible 2013
Krio Bible The Bible Society of Sierra Leone, 2013
:
Sev Notis dɛn