1
“O nwọnghọ ebe wẹ nọ e gu siliva lẹ ebe wẹ nọ a chanchanpụha goru.
2
Alị kẹ wẹ gha e weri igwe; ọmụma hụn igwe-kọpa a rị kẹ wẹ gha a rịnranpụha igwe-kọpa.
3
Ịhịan e gi ukpẹ a banye imẹ ishi; ọ gwalọ ebe kachanrịn e te imẹ alị a chọ ọmụma ihiẹn ndịnị rị imẹ ẹ ebe gbagbu enwẹn ẹ ishi.
4
O jẹnte ebe ịhịan bilẹni d'e gu olu, ebe ụkụ ghalẹni e rudẹ; ọ rị ọrụn imẹ-alị imẹ-alị ịhịan ghalẹni e ru, ya lẹ eriri wẹ kẹnmẹye ẹ ukun, o gi e jẹnjẹn e jẹnlụa.
5
Alị hụn ihiẹn-oriri gha elu ẹ a pụha ịya kẹ okpuru ẹ nọ nwan kẹ ebe dụn ọkụn;
6
ọmụma rịn'a kẹ safaya gha a pụha; ẹjan rịn'a nwọnsọnmẹ ọkpụrụkpụ goru.
7
Nnụnụ ka ibe ẹ ebe teni e legha amarịndẹ ụzọ wẹ ghasọnmẹ e jẹn ebeni zuerini; onwọnni egbe ọwụlẹ ẹnya a leghatu wẹ.
8
Eje-anụ e gbudẹ ịhịan ara ru ebẹhụ — onwọnni ẹwọrọ a kpa ebahụn.
9
Ẹka ịhịan e gukpọ ọmụma zeni, d'e ru ni ukun ugu a gba oghe.
10
O be ụzọ e ye imẹ ọmụma, ẹnya a a hụn ihiẹn ile w'a chọ achọ rịn'a.
11
O gbọnkin iyi ichẹn-ichẹn, e wepụha ihiẹn te zuerini ifọn.
12
“Kanị elebe kẹ w'a nọ nwan hụn amamihiẹn? Elebe kẹ nghọta bi?
13
Ịhịan amarịn; w'a ra hụn a imẹ ndị rị ndụn elu ụwanị.
14
Mirin rị imẹ-alị imẹ-alị sị, ‘Ẹlẹ imẹ m k'ọ rị’; ohimin sị, ‘Ẹlẹ iwe m k'ọ rị.’
15
W'a ra gidẹ goru kachanrịn mma ṅọn ẹ; onwọnni siliva ru ọnụ a.
16
W'a ra gidẹ goru alị Ofiri hụn pụ ichẹn ṅọn ẹ, mọbụ ọnik'si mọbụ safaya umunẹ goru.
17
Kẹ goru kẹ ughegbe e be nwaịn-nwaịn anọnị kẹ ịya kaka, onwọnni ihiẹn goru w'e gi ghatarị a.
18
Kọralụ e gbukeni w'a chọ achọ lẹ jaspa nwẹnẹ ẹ erudẹni w'e fọn ẹfan ebe ọ rị; onwọnni hụn wẹ gi e ṅọn amamihiẹn.
19
W'a ra gidẹ tọpazị Ẹtiopịa e gbukeni jen'ẹ; w'a ra gidẹ ezigbo goru ṅọn ẹ.
20
“Elebe kẹ amamihiẹn gha nwan a bịa? Elebe kẹ nghọta bi?
21
Onwọnni ihiẹn rị ndụn marịnn'a, nnụnụ e fe imẹ elu amarịnd'a.
22
Ntikpọ lẹ Ọnwụn sị, ‘Ẹnyi a nụhụ kẹ wẹ rị e ku oku ẹ.’
23
“Chuku sụọ ghọta ụzọ ebe ọ rị, ịya sụọ marịn ebe o bi —
24
makẹni ịya a hụnchanrịn elu ụwa ile, a hụnchanrịn ihiẹn ile rị okpuru igwere.
25
Ogẹn o gi mẹ ufere femẹ k'o fe, mẹ mirin han k'ọ han —
26
ogẹn o gi tini mirin iwu o gi e zue, tumẹni amụma ụzọ o k'a gha.
27
Ogẹn hụ k'o gi lehunmẹ amamihiẹn, ku ihiẹn ọ wụ; mẹ ẹ turu, lele ẹ.
28
Ya ọ nọ sị ịhịan, ‘Ịtụ egun Osolobuẹ — ịya wụ amamihiẹn, ịjụ eje-ihiẹn — ịya wụ nghọta.’ ”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc