×

Iu Mien Bible 2007

Yopv 28

1
“Zien aqv, maaih wetv nyaanh nyei ciangv, yaac maaih dorngx sinx jiem.
2
Hlieqv yiem ndau-ndiev wetv cuotv daaih, dongh yaac yiem la'bieiv sinx daaih.
3
Mienh bun hmuangx nyei dorngx tiuv benx njang. Ninh mbuo zimh lorz yiem go jiex nyei dorngx, yiem mapv hmuangx nyei dorngx wetv cuotv la'bieiv.
4
Ninh mbuo yiem leih mienh nyei dorngx go nyei, wetv ndau-ndiev nyei kuotv, jiex jauv nyei mienh zungv maiv jangx ninh mbuo. Ninh mbuo leih duqv mienh go, yiem kuotv gu'nyuoz nanv jienv hlaang ndioux mingh ndioux daaih.
5
Ndau-beih aeqv, cuotv laangh ziqc, mv baac ndau-ndiev lunc nzengc hnangv zuqc douz buov nor.
6
Ndau-ndiev nyei la'bieiv maaih la'bieiv-jaaix mbuov nyei, la'bieiv gu'nyuoz yaac maaih jiem-mbuonv.
7
“Wuov diuh jauv maiv maaih haaix norm domh jaangv hiuv, domh jaangv-ngongh nyei m'zing yaac maiv buatc jiex.
8
Ciouv nyei hieh zoih maiv caaiv jiex, sienh yaac maiv yangh jiex wuov.
9
“Mienh sung buoz mborqv ngaengc haic nyei la'bieiv, wetv mbong njiec taux gorn.
10
Ninh yiem la'bieiv-mbaengx gu'nyuoz wetv jauv, ninh nyei m'zing duqv buatc nyungc-nyungc jaaix nyei ga'naaiv.
11
Ninh zaeqv jienv wuom-nyuonh, maiv bun wuom saamx cuotv, bun bingx jienv nyei ga'naaiv cuotv daaih yiem njang.
12
“Mv baac cong-mengh aeqv, oix zuqc mingh haaix ndau lorz? Wuonh zaang nyei dorngx yiem haaix?
13
Mienh maiv hiuv duqv cong-mengh nyei jaax-zinh, yiem yaangh gen lorz maiv buatc.
14
Ndau-ndiev nyei wuom gorngv, ‘Cong-mengh maiv yiem yie gu'nyuoz.’ Koiv yaac gorngv, ‘Cong-mengh maiv caux yie yiem.’
15
“Longc jiem maaiz yaac maiv duqv, yaac maiv haih nziang nyaanh zic ninh nyei jaax-zinh.
16
Ofi nyei jiem caux jaaix haic nyei la'bieiv-jieqv baeqc fai mbuov nyei la'bieiv-jaaix yaac maaiz maiv ndutv,
17
jiem caux jaaix nyei gingx yaac beiv maiv taux. Yaac maiv haih longc zien jiem nyei jaa-sic maaiz ndutv.
18
Liemh maiv zuqc gorngv taux yiem koiv jaaix nyei la'bieiv fai nzang jiex nyei gingx, cong-mengh nyei jaax-zinh se gauh jaaix jiex jaaix nyei la'bieiv-zou.
19
E^ti^o^bie yangh ungv nyei la'bieiv-jaaix yaac maiv haih beiv maiv taux, zien jiem nyei jaax-zinh yaac beiv maiv zaaic aqv.
20
Wuov nyungc cong-mengh yiem haaix daaih? Wuonh zaang nyei dorngx yiem haaix?
21
Cong-mengh se bingx jienv yietc zungv maaih maengc nyei ga'naaiv nyei m'zing, yaac gem jienv yiem ndaamv-lungh nyei norqc.
22
Zuqc mietc nyei dorngx caux yiemh gen gorngv, ‘Yie mbuo nyei m'normh haiz deix waac-nziaaux gorngv taux cong-mengh.’
23
“Tin-Hungh mengh baeqc lorz cong-mengh wuov diuh jauv, yaac hiuv duqv cong-mengh yiem nyei dorngx.
24
Weic zuqc ninh mangc taux jomc ndau-beih, yaac buatc yiem lungh ndiev nyei nyungc-nyungc.
25
Tin-Hungh bun nziaaux maaih hniev-daauh wuov zanc, yaac longc ga'naaiv hlaau wuom,
26
ninh paaiv ziangx mbiungc nyei soux mouc, yaac dingc mba'lingc douz nyei jauv,
27
wuov zanc ninh buatc cong-mengh yaac gorngv se longx nyei. Ninh liepc jiez yaac zaah mangc.
28
Tin-Hungh gorngv mbuox mienh, ‘Oix zuqc taaih Ziouv, naaiv se cong-mengh. Yaac oix zuqc guangc orqv sic, naaiv se wuonh zaang.’+”
Iu Mien Bible 2007
ฉบับอักษรโรมันใหม่ Thailand Bible Society, 2007
:
Save Notes