×

Ika Bible 2018

Jobu 29

1
Jobu nọ kusọnmẹ ihiẹn ọ rị e ku, sị,
2
“Omẹni m te nọ kẹ m nọ ifọn ole-lẹ-ole ghanị, kẹ m nọ ogẹn ahụn Chuku gi rị e lepụ m ẹnya,
3
ogẹn ukpẹ ẹ gi rị e nwunkpu m isi, m nọ rị e gi ukpẹ ẹ a gha ebe gba ishi!
4
Euu, omẹni m te rị kẹ m rị mbụ ogẹn ihiẹn gi rị a ghanị m, ogẹn ahụn Osolobuẹ gi rị e mẹ ikpụlọ m kẹ ndị nke ẹ;
5
ogẹn Onyẹ Hụ Nwọn Ikẹn Ile gi rị a nọyeni m, ogẹn hụ ụmụ m gi fihunmẹ m,
6
ogẹn mirin-ẹran efin m gi jun ụzọ ile, ogẹn alị zegbu enwẹn ẹ gi a mụpụhanị m ofigbọn-olivu.
7
Ogẹn m gi e jẹn ọgwa ọnụ-mgbọn obodo, e weri ocho m ebe ịhịan ile nọ e zu.
8
Ikorọbịa hụn m ogẹn ahụn, a nọye wẹ nkọ, ndị ẹgẹdi nkẹ e wuzo ọtọ;
9
ndị-isi e kubehi oku, gi ẹka kpumẹ ọnụ wẹ;
10
anụkọdẹ wẹ olu ndị ịhaịmẹ, ire a nyantọ wẹ okpo.
11
Onyẹ nụ olu m, o ku oku m ọhụnma; onyẹ hụn m, o liyeni m ẹka.
12
Makẹni, m'a gbapụha ogbẹnnyẹ rị a kwan nị wẹ yen'ẹ ẹka, wẹ lẹ onyẹ nwọnlẹni nẹdi lẹ onyẹ e yen'ẹ ẹka.
13
Ndị te nwụnkọnị a gọzi m agọzi; m'e mẹ obi a sụọmazị onyẹ di ẹ nwụn ụsụọ — ọ bụma ẹbụ-ịghọghọ.
14
M'e yi ezi-omumẹ kẹ ẹkwa, ezioku wụ ẹwuru m tueru alị lẹ okpu-isi m.
15
M te wụ ẹnya ndị ẹnya-ishi lẹ ụkụ ndị ngụrọ.
16
M wụ nẹdi ndị elu rị a fụ ogẹn hụ; m'e buru oku otumunyẹ isi.
17
M'e tikwọnpụ ndị-ejẹ eze, a napụ wẹ ndị wẹ tadọn.
18
M te hụ a sị enwẹn m, ‘M k'a nọ nwan ụlọ ẹka m nwụn ọnwụn-ẹhi — m kakpụkpọgụ.’
19
‘Mkpọgụn m k'e kunrun mirin, igirigi k'a gha e zinye aganaba m kẹ uhinhin han.’
20
‘Ọghọ m k'a wụsọnmẹ nke ọhụn; ụta rị m ẹka k'e kẹnrẹnsọnmẹ nọkẹ nke ọhụn.’
21
Ogẹn mbụ ahụn, ịhịan e gọn ntịn nị wẹ nụchanrịn ihiẹn m k'e ku — a gba-nkịtịn, e che nị wẹ marịn uche m.
22
M kugụ, w'a ra kuzi — m kugụ ẹhụ e mẹ wẹ jụụ.
23
Wẹ te e che m kẹ w'e che mbụmbụ-mirin, e lura oku m kẹ mirin-ahụa.
24
M mụyeni wẹ ẹmụ, ọ tụ wẹ ẹnya, sụọ wẹ; ẹmụ rị m ihun, ndụn a ban wẹ.
25
Mmẹ a gwa wẹ ebe w'a gha, a nọdị m kẹ onyẹ-isi; ogẹn ahụn, m nọ kẹ eze rị igunrun ndị-agha a; m rị kẹ onyẹ a rọkọ ndị rị a kwannị obi.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes