×

BIBELE 1951

Jobo 29

1
Jobo a iša pele go ntšha diema tša gagwe, a re:
2
A nka be ke sa le wa kgwedi tšela tša mohlamonene, wa mehla yela ke sa letwa ke Modimo!
3
Mola lebone la gagwe le tuka le le godimo ga ka, ka sepela ke na le seedi sagwe leswiswing,
4
ka etša mola ke sa le monna, mola go kwana le Modimo go le ngwakong wa ka,
5
mola Yomaatlaohle a sa na le nna, masogana a ka a ntikologile,
6
mola ke sa hlapa nao ka lebese, thaba e sa ntšwela dinokana tša makhura,
7
ke sa fela ke etšwa ka kgoro ke eya motseng, sedulo sa ka ke se bea mabatleng;
8
masogana ge a mpona a ntšhuthela, mme ba hlogoputswa ba tsoga ba ema,
9
bakgomana ba lesa go bolela, ba dula ba swere melomo,
10
le mantšu a ditona a se hlwe a kwala, maleme a bona a gomarela magalapa.
11
Tsebe e nkwilego ya re: Ke na le mahlatse! Leihlo le mponego le be le ntlhatsela.
12
Gobane ke be ke lokolla mosenyegi ge a lla, le sešuana ge se hloka monamodi.
13
Ka tlelwa ke ditšhegofatšo tša ba ba bego ba lahlilwe, ka hlaladiša pelo ya mohlologadi.
14
Ke be ke apere toko; toko e apere nna; moahlolelo wa ka wa ba seaparo le seala.
15
Ke be ke le mahlo a sefofu, ke le maoto a segole.
16
Ke be ke le tatagobahloki; ke be ke lotolotša taba ya yo ke sa mo tsebego.
17
Yo kgopo ke be ke mo roba mohlagare, ka mo ntšhiša tše a bego a di swere le ka meno.
18
Ke be ke re ke tlo felela le sehlaga sa ka, ke atetšwe ke matšatši boka nong.
19
Ka re ke namile medu mo meetseng, ka re thabe tša ka di tlo lala di ne phoka.
20
Bogolo bja ka ka re bo ka se onale, bora bja ka bo tlo dula bo tiile atleng sa ka.
21
Ba be ba ntheetša, ba ntetela; ge ke ba eleditše ba homola.
22
Ge go boletše nna, go be go sa hlwe go bua motho, eke ba nilwe ke polelo tša ka.
23
Ba be ba ntetela boka pula ya tsheola, ba ahlama eke ba kgalegetše modupi.
24
Ge ba holofologile, ke be ke sega nabo, mme ba se nyatše go ela ga fahlogo sa ka.
25
Ge ke tlile go lakana nabo, ke be ke dula ke le wa pele, ka dula bo ka kgoši e le gare ga dira tša yona, eke ke homotša ba ba nyamilego.
Sotho Bible 1951
Bible Society of South Africa 1986
:
Boloka Lintlha