×

EBIBILIA ENCHENU 2020

AYUBU 30

1
“Korende bono abanto bare abake asende, nigo bagonsekerera, abwo abaise babo batagwenereti kende, anga ntababegete nonya nase egati ye chisese chikorenda amaicho aane.
2
Abanto abwo chinguru chiabo chiaerire ase obogotu, ngokonywa ki ndanyore korwa ase amaboko abo?
3
Ase engencho y’okoremerwa na enchara babeire ebigonkobe, nigo bakona‐kogokona namaino abo riroba eriomo pa, erio riasaregete.
4
Nigo bakona‐gosangereria ebimeri bie chinsana, na baremora emeri y’emete enga buna ebisanka.
5
Abwo nigo bagoserigwa korwa ase egati y’abanto, baakerwa amariogi korwa nyuma na kwogererwa buna abaibi.
6
Ase igo bagenda komenya ase amakuruma are ase amagoko, na ase chingoro inse y’ense, na ase ebitare.
7
Ime ase ebitutu nigo bakwogererana, inse y’amasa akorura nao bagosangererekana amo.
8
Barabwo nabana b’abanto abariri na ab’abakayayu; nigo baseretigwe nemecharichi barue ase ense.
9
Na bono inche nabeire engero egoterwa asebare, ee, nabeire asebare ring’ana rikorabaarwa.
10
Barabwo nigo bangechete, bantamire; tibetangeti gontwera amate obosio bwane.
11
Nyasae ong’urire chinguru, naende onkorire koba omoitongo, na abanto abwo babeire abaremu ase ogonkorera bobe.
12
Abasae abwo abasaria nigo bagontubokera korwa ensemo yane ya borio, erio baminyokia gonseria; nigo bagokora emeroberio emenge y’ogonsiria.
13
Basaririe enchera yane ngoetera; abwo batabwate gokonyeka konde abanyene, nigo bagokonya abande ase ogonsiria.
14
Nigo bakobagora aase aagare banchichera ne chinguru, erio bang’umokera goetera ase omogwa oyio babagoire.
15
Okogoswa gwanchicheire; ogosikwa kwane gwasirigwe buna omwaga ogosiria, na obotenenku bwane bwasirire pi buna amare agosira.
16
Na bono omoyo one oberire ime yane; amatuko ’emechando ambwatereire bokong’u.
17
Amauga ’omobere one nigo akonyatia botuko bokia, na obororo bokondia tibori gokenda.
18
Oborwaire bwane bwabeire ne chinguru bwaonchoire risankwa ri’omobere one, bono nigo ring’usererete buna rigoti ri’eanga yane.
19
Nyasae ontugutire ase etintira ime, nabeire buna orotu ne ribu.
20
“Nigo nkorera asore, korende aye tori kong’iraneria; nigo nteneine asore, korende aye nigo onsonchete rioka.
21
Aye kwabeire omotindi asende; nigo okondwania nokoboko kwao kore ne chinguru.
22
Aye nigo onyimokereretie igoro kwambekire ase omwaga na kondiinia igoro yaye. Aye nigo okona‐konuchania gochia aaria na aaria, naba bosa ase omwaga omotindi.
23
Ee, namanyire ng’a nong’ire aase abakure, ase enyomba eria echikeire abare moyo bonsi.
24
Inee! Omonto karagwe takorambora okoboko kwaye, na ase emechando yaye arere akonywe?
25
Inee! Tinarerete ase engencho y’abwo barenge ase emechando? Omoyo one tochandekerete abataka?
26
Korende ekero nasemeretie konyora amaya, amabe agacha, na ekero nabete nsemeretie konyora oborabu, omosunte ogacha.
27
Enkoro yane nigo ere nemechando mono, teri nobotoereru, amatuko ’emechando anchicheire.
28
Nigo nkona‐koong’anya inde nemechando ntarochi omobaso; nigo ngotenena ase omosangererekano, narera ng’a nkonywe.
29
Inche nabeire oyomwabo chisese chi’orosana, na omogisangio bwe chisagero.
30
Risankwa riane riaonchokire riamwamire ti, na nigo rikona‐kobutoka, na amauga aane nigo akoyia buna omorero.
31
Obokano bwane bw’ebirigisa nigo bokominwa bwaba obw’ebirero, na ekeroria kiane kiaonchoiwe kobugigwa ase abanto bakorera.”
Gussi Bible 2020
OLD EKEGUSII BIBLE PROTESTANT EDITION Bible Society of Kenya, 2020
:
Save Notes