×

Ika Bible 2018

Jobu 31

1
“Mmẹ lẹ ẹnya m e kwerigbamagụọ nị anịkọ m nwagbọọ la m ẹnya.
2
Kịnị kẹ Chuku rị elu dọnmẹdẹni ịhịan? Kịnị kẹ ịhịan k'e nwọnhẹn ẹka Onyẹ Ahụn rị elu hụn nwọn Ikẹn Ile?
3
Ẹlẹzidẹ nwan ndị-njọ a la iwi ra? Ẹlẹzidẹ ndị e mẹ eje-ihiẹn kẹ eje-ihiẹn e kunrun?
4
Chuku arị a hụndẹ kẹ m dọn rị e bi? Ara gụndẹ ụkụ ile m'a han?
5
Omẹkwọnị m'a tụ ntụ mọbụ n'ọ kẹrẹgụọnị ụkụ m dufie ịhịan —
6
ẹghẹẹ, Chuku ya gi ezigbo ihiẹn lele m, o k'a hụn a nị ẹka m rị ọchan.
7
“Omẹkwọnị ụkụ m a ghagụọ ụzọ hụ rị mma pụ; omẹkwọnị ẹnya m a kịghọ obi m mọbụ nị ẹka m a rụgụọ,
8
onyẹ ọzọ ya ri nwan ihiẹn m kụn, wẹ huepụ ihiẹn rị ugbo m.
9
Omẹkwọnị okpoho e nwunyeghọ m ẹnya mọbụ nị a chọghọ m oghere m'e gi na nwunyẹ ịhịan,
10
nwunyẹ m ya shimẹni nwan okẹnnyẹ ọzọ ihiẹn-oriri; okẹnnyẹ ọzọ ya sọn ẹ ranhịn.
11
Makẹni ọhụn nkẹ a wụ okẹn eje-ihiẹn, njọ hụn chọ afụnfụn.
12
Ọkụn hụn a dụnnị, e buhẹ Ntikpọ rọ — nkẹ o dụnpụchanrịn ihiẹn ile rị ugbo m.
13
Omẹni a gbaghọ m idibo m nkịtịn, kẹ ikẹnnyẹ kẹ ikpoho, ogẹn wẹ gi gwa m ihiẹn m mẹ wẹ,
14
kẹ m k'e mẹ ogẹn Chuku e gi jụ m'a? Kẹ m k'e kin ọ jụma m ukwere ẹ?
15
Ẹlẹ onyẹ mẹmẹ m imẹ ẹfọ nnẹ m mẹmẹzi wẹ nwẹn? Ẹlẹ onyẹ ohu hụ mẹmẹ ẹnyi ile imẹ ẹfọ nnẹ ẹnyi?
16
Omẹni o nwọnghọ ihiẹn ọwụlẹ rị ndị igbẹnnyẹ mkpa hụn m jụ n'e yekọ m wẹ, mọbụ nị a latọgụọ m onyẹ di ẹ nwụn hụn rị a tụ ẹnya eyemẹka m;
17
omẹkwọnị mmẹ sụọ e righọ ihiẹn-oriri m — ekeyeni m ndị nwọnlẹni nẹdi:
18
ghakwọrị ogẹn m gi wụ okorọbịa, m'a zụndẹ onyẹ nwọnlẹni nẹdi kẹ nwa, m'e yeni ndị di wẹ nwụn ẹka kete wẹ mụlẹ m.
19
Omẹkwọnị a hụnghọ m onyẹ elu ẹ lakọ makẹni ẹkwa o k'e yi arị a mọbụ onyẹ elu rị a fụ nwọnlẹni ẹwuru,
20
nị eyeni m'ẹ ẹkwa chụ a oyi — ẹkwa wẹ gi ẹṅẹnrẹn atụnrụn m mẹmẹ, o gi obi ẹ ile gọzi m;
21
omẹkwọnị e weshitughọ m ẹka elu mẹ onyẹ nwọnlẹni nẹdi ihiẹn, makẹni a marịnghọ m nị m nwọn ịhịan ọgwa,
22
ẹka m ya gha nku-ẹka m kwapụ, ya gha okẹn ẹ kwapụ.
23
Egun otikpọ Chuku k'e tikpọ m a tụ m atụ, egun Onyẹ Hụn Ọ Wụ anịnị m mẹ ihiẹn ndị nọ ẹrịra.
24
Omẹkwọnị e gighọ m goru dọn ẹnya mọbụ sị ezigbo goru, ‘Ịyụ kẹ m danbemẹ;’
25
omẹkwọnị e gighọ m ufiri okẹn ihiẹn m nwọn ghọghọ, ufiri ihiẹn rị mma hụn ban m ẹka,
26
omẹkwọnị e leghọ m anwụn rị a mụnị ile mọbụ lee ifọn ile k'ọ ghakọ ọghọ-ọghọ —
27
nke wụnị a la wẹ m ẹnya bụ onwọnni onyẹ marịnnị, e weshini m wẹ ẹka elu ye wẹ mgbaye,
28
ihiẹn ndịnị nkẹ a wụzị njọ w'e gi ye afụnfụn, makẹni ọhụn wụ ịtụ Chuku rị elu ntụ.
29
Omẹkwọnị a ghọghọghọ m makẹni eje-ihiẹn kunrun eṅẹnrẹn m mọbụ ṅan makẹni nsọngbu bịan'a —
30
mmẹ hụn kelẹni nịtudẹ ọnụ m mẹ njọ ghahanị ịbụ eṅẹnrẹn m ọnụ n'ọ nwụnhụn!
31
Omẹkwọnị ndị rị iwe m asịtuni, ‘Onyẹ wụ onyẹ hụn kelẹni ri ihiẹn-oriri Jobu rijun ẹfọ?’ Nkẹ ọ rị ichẹn.
32
Onwọnni otumunyẹ m nịtu ranhịn ogbe, m'a nabanhanchanrịn ndị ijẹn iwe m ogẹn ile.
33
Omẹkwọnị e kpumẹghọ m njọ m kẹ ịhịan e mẹ, kpugbu eje-ihiẹn m mẹ imẹ obi —
34
ebe m rị a tụ egun ịhịan makẹ ebọn ichẹn-ichẹn gha e legberi m nkesịnị a gba m nkịtịn, apụnị m ezi!
35
Omẹni m te hụn onyẹ k'e gọn m ntịn! M rị nwan e biye ẹka ihiẹn m rị e kin — Chuku, Onyẹ Hụ Nwọn Ikẹn Ile, y'a shịarị m; onyẹ rị e kpe m ikpe ya depụha ihiẹn m mẹ o gi e kpe m.
36
M'e k'e tu omẹni m te hụn, nkẹ a nyanrịn m ihiẹn o de ni ya kẹ mmẹ uvun, nkẹ m'e kpurudẹ ẹ kẹ okpu-eze.
37
Nkẹ m'a gbachanrịnn'a ihiẹn ile m'e mẹ; nkẹ egun a nị m nọkunmẹ ẹ kẹ nwa eze.
38
“Omẹkwọnị alị ugbo m rị a kwanye m ẹkwan olu a ma m ikpe, nke wụnị ẹnya-mirin e jundẹ ote ile rịn'a;
39
omẹni e rigụọ m ihiẹn ọ mịpụha bụ a kụnị m ndị rụnn'a ụgwọ mọbụ n'e mẹgụọ m ndụn gụ ndị rị a rụnn'a —
40
ya pu nwan ata ẹlẹ ọka-witi, ya pu ẹfịfịa ẹlẹ ọka-bali.” Jobu e kugụọ.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes