×

Ika Bible 2018

Jobu 32

1
Ndị ọwụ Jobu ẹtịtọ hụ nọ nwan shịarịbehi Jobu oku makẹni o kubehini nị ẹka a rị ọchan.
2
Ya kẹ Ẹlihu nwa Barakẹlụ onyẹ ebọn Buzu, onyẹ ikpụlọ Ram, nọ bumẹni Jobu olulu makẹni Jobu hụ e ku ẹ ekushi ẹ ikẹn nị ịya mẹlẹni eje-ihiẹn ẹlẹ Chuku.
3
Ẹlaịhu hụzị e buni ndị ọwụ Jobu ẹtịtọ ibe ẹ olulu, makẹni, asanị wẹ ẹka shịarị Jobu, ghọsị a n'o mẹfieghọ kẹ wẹ dọn rị e ku.
4
Ẹlihu nwa Barakẹlụ onyẹ Buzu nkẹ e biegụọ n'o d'a gwama Jobu oku makẹni wẹ ile dịan a.
5
Kanị, ogẹn o gi hụn a nị wẹ ẹtịtọ enwọnzi ihiẹn wẹ k'e ku, ya kẹ iwe nọ wemẹ ẹ ọda-ọda.
6
Ya kẹ Ẹlihu nọ nwan sị, “M wụhụ okorọbịa, ụnụ nwẹn wụ ndị ẹgẹdi — ya haịn egun gi rị a tụ m; egun anịnị m gwa ụnụ ihiẹn m marịn.
7
M te sị, ‘Ndị dịannị m wẹ ku; onyẹ gha a tọwaye ọ hụ a marịnwaye.’
8
Kanị, mmọn hụn rị imẹ ịhịan, uzun hụn Onyẹ Hụ Nwọn Ikẹn Ile kunye imẹ ẹ, e ye ịhịan nghọta.
9
Ẹlẹ ndị kamagụnị sụọ nwọn uche, ẹlẹ ndị ẹgẹdi sụọ a ghọta ihiẹn rị mma.
10
M rị nwan a sị: Gọn ni m ntịn; mmẹ nwẹn k'a gwazịkwọ ụnụ ihiẹn m marịn.
11
M cheri echeri kẹ ụnụ rị e ku; e gọnghọ m ntịn ihiẹn ụnụ kọwa, e gọnghọ m ntịn ebe ụnụ rị a chọ ihiẹn ụnụ k'e ku.
12
M gọnchanrịn ụnụ ntịn. Onwọnni onyẹ ọwụlẹ imẹ ụnụ hụn saẹka ghọsị Jobu ebe ọ nọ mẹfie, onwọnni onyẹ saẹka shịarị a ihiẹn ọ rị e kin —
13
amamgbe ụnụ a sị, ‘Ẹnyi nwẹn a marịnghọ ihiẹn ẹnyi rị e ku — Chuku ya gi nwan ẹka a shịarị Jobu, ẹlẹ ịhịan k'a shịarị a.’
14
Ẹlẹ mmẹ kẹ Jobu rị e sọn a dọ ihiẹn ọ rị a dọ, ashịarịkọ m'a ihiẹn ụnụ shịarị a.
15
“Ndụn a gụgụọ wẹ, enwọnzi wẹ ihiẹn wẹ k'e ku; oku a gụgụọ wẹ ọnụ.
16
Nị m nọdịkwọ e che? Hụnnị wẹ gba nkịtịn; hụnnị wẹ nwọnzilẹni ihiẹn wẹ k'a za?
17
Mmẹ nwẹn sikọ d'e ku nke m; mmẹ nwẹn sikọ d'e ku ihiẹn m marịn.
18
Oku jun m ọnụ; mmọn m rị e nu m ‘ku, ku’;
19
imẹ m, m nọhụ kẹ ihiẹn-manya wẹ gbajun manya, ihiẹn-manya rị a chọ n'ọ gbawa.
20
M k'e kurịrị — kẹni ẹhụ mẹ m jụụ; m k'a shịapụrịrị ọnụ m shịarị.
21
Egbeyekọnị m onyẹ ọwụlẹ, ekukọ m n'ọ sụọ onyẹ ọwụlẹ,
22
makẹni omẹni m te wụ onyẹ e ku n'ọ sụọ ịhịan, nkẹ Onyẹ Hụn keni m e wepụkẹnrin m.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes