|
| 1 |
|
| “Aye Ayubu, bono inyigwe, ntegerera ase onsi aya ngokwana. |
|
| 2 |
|
| Rora, bono namumoire omonwa one, na oromeme rwane rwachakire gokwana. |
|
| 3 |
|
| Amang’ana aane nigo akoorokia oboronge bore ime ase enkoro yane, na ase omonwa one nigo ngokwana aya imanyete. |
|
| 4 |
|
| Omoika o Nyasae noro ontongete, na omoika bw’obomoyo bw’Omonguru noro okong’a obogima.” |
|
| 5 |
|
| “Bono ing’iranerie onye gokonyara; beka amang’ana ao ang’e, otenene bokong’u! |
|
| 6 |
|
| Rora, inche nigo inde buna aye ase obosio bwa Nyasae; inche boigo nigo natongetwe korwa ase riroba. |
|
| 7 |
|
| Rora, inche tindi kende ogwenerete konyoboa; gose tindi gochia koba buna egurube endito asore.” |
|
| 8 |
|
| “Ekeene, gwakwanire ase ntegererete, na inche naigure amang’ana ao. |
|
| 9 |
|
| Aye nigo ogoteba iga: Inche nigo nchenegete, tindi nogosaria konde, na bibe tibiri ime yane. |
|
| 10 |
|
| Naama! Nyasae onyorire amasoero asende, na ombarire ng’a nomobisa oye inde. |
|
| 11 |
|
| Osoirie amagoro aane ase rikorogoto, na nigo akoba ondigereretie ase oboeto bwane bwonsi.” |
|
| 12 |
|
| “Naama! Nigo ngokoiraneria ng’a ase amang’ana aya tokwaneti ekeene; Nyasae nigo are omonene goetania mwanyabanto. |
|
| 13 |
|
| Nase ki okoamererania nere kogoteba ng’a ere takoiraneria amang’ana aya nonya nerimo? |
|
| 14 |
|
| Ekeene, Nyasae nigo agokwana ase enchera eyemo, gose ibere; nonya nabo monto onde tari okomotegerera. |
|
| 15 |
|
| Nigo agokwana ase chindoto na amaroro a botuko, na ekero abanto bararire chitoro chindito, na ekero basundokire ase amarere abo. |
|
| 16 |
|
| Erio agwo otinora amato ’abanto, na obarentera ogokurera gw’okoondokia |
|
| 17 |
|
| ng’a anyare koonchora omonto atige ogokora kwaye okobe, na atange oboenenu bw’omonto. |
|
| 18 |
|
| Nigo agotanga omonto tagenda ase oboina, naende orenda obogima bwaye tibosirigwa nomoro. |
|
| 19 |
|
| Omonto nigo akonyora egesusuro gi’okomorongeyia, ekero are nobororo ase oborere bwaye, na amauga aye agendererete komwatia. |
|
| 20 |
|
| Omoyo oye ogecha endagera, nonya endagera ere engiya mono. |
|
| 21 |
|
| Chinyama chi’omobere oye nigo chikoera, tichikororekana, na amauga aye atongorora. |
|
| 22 |
|
| Ere omonyene nigo agosuka gochia ang’e noboina, na obogima bwaye gochia ase abagosiria obogima.” |
|
| 23 |
|
| “Onye omomalaika nkoba arenge asare, oyomo bwa baria chilifu bagokora okobwatania asare, erinde amworokie ayare ay’oboronge, |
|
| 24 |
|
| erio amororere amabera, atebe: Tooria omonto oyo tabaisa gotirimboka gochia ase oboina, ekiagera inche namonyoreire embooria. |
|
| 25 |
|
| Omobere oye oiranigwe obe buna oyo bw’obosae bwaye, naende aonchorwe abe buna ekero arenge ne chinguru. |
|
| 26 |
|
| Ekero arabe ogosaba Nyasae, nere namororere amabera; omonto oyio nachiche ase obosio bwaye ore nomogoko, na Nyasae nairanie oboronge bw’omonto oyio. |
|
| 27 |
|
| Omonto oyio natere ase amasio ’abanto, atebe: Nigo nakorete ebibe, nkaonchorana aya arenge amaronge, gose tinanyorete egesusuro buna nagwenerete. |
|
| 28 |
|
| Ere obooririe omoyo one togenda ase oboina, bono obogima bwane mborore oborabu. |
|
| 29 |
|
| Rora, Nyasae nigo agokora amang’ana ayio onsi ase omonto ara kabere, gose ara gatato, |
|
| 30 |
|
| erinde amoiranie korwa ase oboina, ng’a oyio anyare komorekerwa noborabu bw’obogima.” |
|
| 31 |
|
| “Aye Ayubu, ntegerera, okire‐kiri, inche nkwane. |
|
| 32 |
|
| Onye kobwate ing’ana rinde okong’iraneria, kwana, ekiagera nigo nganetie gokoa oboronge bwao. |
|
| 33 |
|
| Onye tobwati kende, kira‐kiri ontegerere, na inche ninkworokererie obong’aini.” |
|
|
|
|