×

Ika Bible 2018

Jobu 33

1
“Jobu, dodo gọn nwan ntịn oku m; nụkpọ ihiẹn ile m k'e ku.
2
M'e d'a shịapụ ọnụ m; ihiẹn m k'e ku a rịgụọlẹ m ọnụ.
3
Obi rị ọchan kẹ m gi e ku; ọnụ m jẹnkọ d'e ku ihiẹn m marịn wụ ezioku.
4
Mmọn Chuku e kegụọ m; uzun Onyẹ Hụ Nwọn Ikẹn Ile e ye m ndụn.
5
Shịarị m nwan, omẹni ị s'ẹka; kwademẹ enwẹn i n'i sọn m dọ.
6
Mmẹ lẹ ịyụ wụ ohu ẹnya Chuku; ẹjan kẹ wẹ gizi mẹmẹ mmẹ nwẹn.
7
Anịlẹ nwan egun m tụ ị, erolẹ nị m bịa d'e rọn i egun
8
Kanị y'e kugụọ a ye m ntịn — a nụghọ m'a kẹ i ku ẹ —
9
sị, ‘M rị ọchan; njọ arị imẹ m. M nwun e nwun; onwọnni eje-ihiẹn m mẹ.’
10
Ị sị ‘Kanị Chuku rị a ma m ikpe njọ; o werigụọ m nọkẹ eṅẹnrẹn ẹ.
11
Ọ kpọma m ẹgan ụkụ ẹbụbụọ, e ke m nke ebe ile m jẹnkọ.’
12
Kanị, m rị a gwa ị — hụnnị i ku ẹlẹ ezioku; makẹni Chuku ka ịhịan.
13
K'ị rị nwan e duni Chuku e kpe nị ara shịarị ịhịan ihiẹn ọwụlẹ?
14
Mba. Chuku e ku oku eku: o ku ẹ ụzọ ichẹn-ichẹn, o ku ẹ, o kudọnzi ẹ — bụ onwọnni onyẹ a marịnnị.
15
Imẹ nrọ, imẹ ọhụn w'a hụn imẹ abalị, ebe ịhịan ranhịnmigụ, ebe wẹ dinẹ elu-ukpo —
16
ọ gwa ịhịan oku, a gba wẹ mkpịnsịn-ẹka e rọn egun —
17
o gi ẹ e mẹ ịhịan a latọ eje-ihiẹn, mẹ ẹ apachelẹ,
18
amamgbe ọ danye olu ahụn wụ ọnwụn, amamgbe ọ la mmọn.
19
O nwọnzi ikẹn gi emu ye ịhịan afụnfụn, ọ kụ a d'e ru ọkpụkpụ, kụsọnmẹ ẹ,
20
nke wụnị ihiẹn-oriri asụọkọzị a kaka, ihiẹn-oriri rịgbudẹ enwẹn ẹ mma e zegbu ẹ ize.
21
O fiechanrịn ẹhụ, ọkpụkpụ a wẹ ghalẹni e legha, a pụhachanrịn ifọn.
22
O rugụọ mgbọngbọn ili, ọ nọkunmẹchanrịngụọ ndị mmọn-ozi ọnwụn.
23
Kanị omẹni o nwọnghọ onyẹ-ozi rị a nsue onyẹ k'a rịọn'a Osolobuẹ, ọsụọn'a ohu imẹ nnụ ole-lẹ-ole, hụn k'a gwa onyẹ hụ ihiẹn o furu n'o mẹ,
24
n'o mẹn'ẹ ọhụnma, sị, ‘Chuku, dodo anịl'a la mmọn, n'a hụngụọ m ihiẹn wẹ e gi gbarị a’ —
25
O sikọ d'a dịnhịn, ẹhụ a rịzị a kẹ nke nwa-ndu; o họnrinzi okoro.
26
O mẹ ekpere jẹnni Chuku, Chuku e mẹn'ẹ ọhụnma, ọ hụn ihun Chuku, yi oro ịghọghọ; Chuku e mẹ ihiẹn rịzịn'a mma k'ọ rị mbụ.
27
Ogẹn ahụn, ọ gwama ịhịan, ‘E mẹọlẹ m njọ, kpọ ihiẹn rị mma eje-ihiẹn, kanị Chuku egichanrịnnị ihiẹn ile m mẹ sọn m.
28
Ọ gbapụha m ẹka ọnwụn, m rị nwan ndụn, e legha ukpẹ.’
29
“Ihiẹn ndịnị ile kẹ Chuku e mẹ ịhịan — ẹlẹ mgbe ohu, ẹlẹ mgbe ẹbụọ —
30
n'o gi ẹ zụọpụha a ẹka ọnwụn, kẹni ukpẹ hụ wụ ndụn hụn ụzọ e nwunkpu ẹ.
31
Gọn ntịn, Jobu — gọn m ntịn; gba nkịtịn, ni m ku.
32
Omẹni i nwọn ihiẹn ọwụlẹ i k'e ku, shịarị m nwan; kumẹ, makẹni m chọ nị wẹ hụn a nị ẹka ị rị ọchan.
33
Kanị, omẹni y'e nwọn ihiẹn i k'e ku, gọn m nwan ntịn; gba nkịtịn, nị m kuzi i amamihiẹn!”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes